Wčera přija Jadwiga Kawecka z Namysłówa, dołholětna přećelka Serbow, myto Opolskeho wojewódstwa za kulturu w kategoriji muzeje.

Jadwiga Kawecka podpěraše jako Namysłówska kulturnica na přikład ekskursiju župy “Michał Hórnik” abo tež probowe lěhwo Zwjazka serbskich studowacych w lěće 2017. Župa “Michał Hórnik” ju derje znaje a styki su wosebje wuske.
W lěće 2019 přepoda jej předsydy Dawida Statnika Čestne znamješko Domowiny za jeje  skutkowanje.

Clemens Škoda, referent za wukraj: „Bjez čłowjekow kaž Jadwigi njebychu styki Serbow do słowjanskeho wukraja tak žiwe a połne přećelstwa byli. Zo dóstanje wona za to nětko wotpowědne počesćenje w swojich sferach mje wjeseli a tuž jej za to z wutroby z Łužicy gratuluju. Wjele zboža Jadwiga!“