Dnja 11.12.2017 rozžohnowa so předsyda Domowiny Dawid Statnik ze sakskim ministerskim prezidentom Stanisławom Tilichom w statnej kencliji w Drježdźanach. Tilich bě w oktobrje zdźělił, zo swój hamt ke kóncej lěta złoži.Statnik k tomu: “Wažu sebi Stanisława Tilicha jako politikarja, kotryž je serbstwo a třěšny zwjazk Domowinu we wšelkich wobsahach sylnje podpěrał. Jako najznaćiši Serb je so wón stajnje tež w zjawnosći k swojemu narodej a jako Serb wuznawał. Budu jeho jako partnera a podpěraćela jara parować. Přeju St. Tilichej za dalši žiwjenski puć wšo dobre a nadźijam so na dalše zhromadne dźěło na dobro serbstwa.”Z lěta 2008 skutkowaše Tilich jako třeći ministerski prezident Swobodneho stata Sakskeje. Zdobom běše wón prěni Serb w funkciji prezidenta Zwjazkoweje rady.W lětomaj 1996 a 1997 běše Tilich tež čłon Zwjazkoweho předsydstwa Domowiny.Składnostnje rozžohnowanja přepoda Statnik Tilichej jako znamjo dźaka za zasłužbne skutkowanje wopismo a slěbornak “Serbski dudak”.