Zastupjerjo wolenych serbskich gremijow so hižo štyri měsacy pod nawodnistwom předsydy Domowiny prawidłownje wo přihotach na přichodne financne zrěčenje za spěchowanje serbskich towarstwow, projektow a institucijow wothłosuja. Wo aktualnym stawje informowaše Dawid Statnik srjedu wječor prezidij třěšneho zwjazka. 2. decembra so digitalne posedźenje poradźowaceho wuběrka za prašenja serbskeho ludu poboku zwjazkoweho ministerstwa nutřkowneho wotmě, temy su na namjet Domowiny mjez druhim změna struktury we Łužicy, prawo na serbowanje w zjawnosći a dalše wobchadźenje z wuspěšnej europskej wobydlerskej iniciatiwu Minority SafePack.Prezidij přestorči wuradźowanje zwjazkoweho předsydstwa (ZP) aktualneje situacije pandemije dla wot 20. nowembra na pjatk, 11. decembra. Zdobom poruča prezidij, hłownu zhromadźiznu na kóždy pad 27. měrca w Slepom přewjesć. Jeli je trjeba, w minimalnej wobsadce ca. 50 delegatow na městnje, z móžnosću digitalneho sobudiskutowanja a listowymi wólbami noweho wjednistwa Domowiny do toho. Wo tym chcedźa so z towarstwami a ZP dorozumić. Prezidij je doskónčnje naćisk dźěłowych směrnicow 2021-2023 a hospodarskeho plana 2021 za dalšu diskusiju w ZP a na hłownej zhromadźiznje schwalił. Prezidij dźakuje so wokrjesej Dubja-Błóta za přistup třěšnemu zwjazkej jako spěchowanski čłon a so na spomóžne zhromadne dźěło wjeseli. (Jenož předsyda, městopředsyda Marko Hančik a nawodnica RCW, Beata Brězanowa, běčhu na tutym wuradźowanju w Budyskim Serbskim domje, wšitcy druzy přez wideo-konferencu wobdźěleni.)