Předsyda Domowiny, Dawid Statnik, so pjatk, 8. meje, w 10.30 hodź. na spominanju při pomniku za padłych sowjetskich a pólskich wojakow w Rakecach wobdźěli – při Nowowjesnjanskej dróze, Neudorfer Straße, bjezposrědnje před nowym pohrjebnišćom. Zarjadowanje organizuje župa „Jan Arnošt Smoler” Budyšin. Krěsćan Krawc budźe wo pomniku rěčeć, Manfred Laduš wo bitwišćach we Łužicy kónc apryla 1945. Tež wjesnjanosta Swen Nowotny so na spominanju wobdźěli.Pozadk: „Při nowym pohrjebnišću steji štyrirěčny pomnik za sowjetskich a pólskich wuswobodźerjow z lěta 1980. Z nim bě so narunał wot serbskich studentow na prěnjej powójnskej schadźowance 1946 postajeny pomnik za słowjanskich wuswobodźerjow, kotryž so dźensa w Budyskim Serbskim muzeju chowa.” (Trudla Malinkowa w swojej knize „Serbske pomniki”, str. 97, LND 2019).Na samsnym dnju w 14 hodź. zastupuje Dawid Statnik zhromadnje z Hilžu Mehrowej, čłonku župneho předsydstwa, Domowinu na wopominanju, kotrež budźe na sowjetskim pohrjebnišću w Budyšinje (Mužakowska dróha). Njedźelu, 10. meje, budźe Domowina před wopomnjenskej taflu w Chrósćicach na 75. róčnicu wozrodźenje třěšneho zwjazka spominać – ze swjatočnosću na naměsće při Wjeselic statoku na Hórnikowej 25 w 10.30 hodź. Wo hudźbne wobrubjenje so Donatec bratřa staraja, rěčnikaj staj předsyda Domowiny a županka Zala Cyžowa. Zajimcy su wutrobnje witani. Domowinski zarjad a župa „Michał Hórnik” na to skedźbnjatej, zo maja přitomni mjezsobny wotstawk 1,5 m dodźeržeć a po tuchwilu płaćacych postajenjach ze zakryćom huby a nosa na městnje přebywać. (Tuchwilu su terminy wšěch zarjadowarjow krótkodobnje planowane, dokelž hakle najnowše powólnjenja při koronanaprawach tajke zarjadowanja zaso dowoleja.)