Lobby-dźěło za serbski lud w zwjazkowej politice w Berlinje steješe wutoru (14.12.) cyły dźeń na planje předsydy Domowiny, Dawida Statnika. W zastupnistwje Sakskeje je so ze statnym sekretarom Conradom Clemensom, społnomócnjenym swobodneho stata při Zwjazku, mjez druhim na to dorozumił, zhromadne zarjadowanja wo serbskej tematice přewjedować. Potom je hromadźe z Göstu Nissenom, nawodu mjeńšinoweho sekretariata, łužiskej zapósłanči SPD, Sylviju Lehmann a Kathrin Michel, wopytał. Kaž wonej praještej, chcetej „jako přećelce serbskeho ludu w zwjazkowym sejmje skutkować”. Tomu je so rozmołwa Statnika a Nissena z nowym zapósłancom SSW, Stefanom Seidlerom, přizamknyła. Facit Seidlera, z kotrymž chce Statnik prawidłownu wuměnu pěstować, je: „Budźemy za jedyn postronk ćahnyć, zo by so na narodne mjeńšiny w Zakładnym zakonju Němskeje dźiwało.”

+

Wobrazy: Dawid Statnik/Conrad Clemens, Gösta Nissen/Kathrin Michel/Sylvia Lehmann/Dawid Statnik, Gösta Nissen/Stefan Seidler/Dawid Statnik. Fota: Domowina.