K wutworjenju serbskeje rjadownje w prěnim lětniku Serbskeje zakładneje šule w Radworju wupraja so Katrin Suchec-Dźisławkowa, zastupjerka serbskeje staršiskeje iniciatiwy: „Wjeselimy so, zo je so šulska konferenca srjedu jednohłósnje za to rozsudźiła, w prěnim lětniku serbsku rjadownju ze 14 dźěćimi zarjadować, kotrež so serbsce alfabetizuja und serbski rěčny rum tworja. Wšitcy chodźa zdobom do horta katolskeje pěstowarnje.  Dźakujemy so direktorce Rynčowej, wučerkam zakładneje šule a Bosćijej Handrikej, koordinatorej za serbske naležnosće při Krajnym zarjedźe za šulu a kubłanje, za podpěru. Tež nowa wjesnjanostka Rentsch ze stron nošerja šule je nam hižo do toho ze swojimi jasnymi zjawnymi wuprajenjemi za wažnosć serbšćiny na kubłanišću rjap skrućiła. Z tym a slubjenjom, zo so přichodne lěta dale tak pokročuje, je so próstwam serbskeje staršiskeje iniciatiwy wotpowědowało. Nětko so nadźijamy bórzomneho koncepta za zwyšenje ličby hodźin wučby serbšćiny w druhej rjadowni a za wšěch šulerjow rěčneju skupinow 2 a 3 cyłeje šule – smy sej žadali, ju wot 2 na 5 zwyšić (dźěći serbskeje rjadownje maja tydźensce 7 hodźin serbšćinu).” Dawid Statnik, předsyda Domowiny, kiž je so jako zastupjer třěšneho zwjazka na šulskej konferency wobdźělił:„To je wulki wuspěch angažementa serbskich staršich a wupłód konstruktiwneje kooperacije mjez staršimi, wučerjemi, nošerjom šule, Krajnym zarjadom za šulu a kubłanje a Domowinu. Tu je so přikładnje pokazało, zo móža starši sylna móc być, dokelž ma wola staršich po zakonjach jara wysoku hódnotu. Radwor je jara dobre znamjo za nowe serbske sebjewědomje a dalša kročel do směra kubłanskeho samopostajowanja. Při tym su naši sobuwobydlerjo zapřijeći – to jasnje jednohłósny rozsud šulskeje konferency demonstruje.”