Zwězkowe pśedsedaŕstwo kšywowego zwězka Domowina jo se pětk wjacor zejšło w Błotach. W pósejźarni wokrejsnego sejma Dubje-Błota su wuwitali wice krajny raźc Carsten Saß ako zastupnika wokrejsa a Dörthe Ziemer w mjenju města Lubin cłonkow pśedsedaŕstwa a pśibytnych gósći.Carsten Saß jo informěrował, až se wokrejs wo spěchowańske cłonkojstwo w Domowinje procujo – wokrejsny sejm ma 28. oktobra wó tom rozsuźiś. Njedosega, až to serbske jo jano samorozymliwosć, ale jo trjeba, jo wědobnje w žywjenju prakticerowaś. Dörthe Ziemer jo wopisowała, na kaku wašnju město Lubin po tym, až jo w lěśe 2016 pśistupiło serbskemu sedleńskemu rumoju, toś to rozsuźenje z praktiskim žywjenim wupołnijo. Dawid Statnik jo se oběma źěkował rowno tak ako Sabrinje Kuschy, zagronitej wokrejsa za serbske nastupnosći, za jeje angažement a impulsy. W pśigótowanju na pśiducu głownu a wólbnu zgromaźinu Domowiny dnja 27. měrca 2021 su se pśedłogi źěłowych směrnicow 2021-2023 a wustawki wobzamknuli. Intensiwnje jo se Zwězkowe pśedsedaŕstwo Domowiny pśiwobrośiło aktualnym kubłańsko-politiskim pšašanjam w Dolnej Łužycy. Mimo togo jo informěrował pśedsedaŕ wó pśigótowanju “Lěta župow Domowiny” 2021-2022 pśi góźbje 100. wrośenice jich załoženja a běrow kšywowego zwězka wó stawje pśigótowanjow na mjazynarodny folklorny festiwal “Lausitz/Łužica/Łužyca 2021”. Dalej su se pśibytne zaběrali z móžnosćami rozšyrjenja pśedstajenjow “Ptaškoweje swajźby” w Dolnej Łužycy a wó wuměnje měnjenjow ze zastupnikami iniciatiwy “Serbski sejm”, kenž jo se 31. awgusta w Budyšynje pśewjadła. Dawid Statnik, pśedsedaŕ Domowiny, jo pó pósejźenju gronił:„Smy póstajili směry, aby se mógała pśiduca głowna zgromaźina Domowiny pśewjasć pód wuměnjenjami pandemije. To ma za nas ako bazisowa demokratiska organizacija centralny wuznam. Rownocasnje lažy něnt naraźenje za nacasnu změnu našych wustawkow na bliźe: W nich se pozicija tak pomjenjonych jadnotliwych cłonkow pórědnje rědujo, pótakem takich luźi, kenž njekśě pśez někake towaristwo, ale kśě direktnje a induwiduelnje cłonk Domowiny byś. Teke pśedłoga źěłowego plana 2021-2023 z aktualizěrowanymi nadawkami pśedewšym we wobceŕkach kultury a kubłanja jo gótowa.Zwězkowe pśedsedaŕstwo jo póbitowanje prezidiuma Domowiny iniciatiwje “Serbski sejm” wobkšuśiło, ako cłonk w zgromaźeństwje serbskich towaristwow, kupkow a zwězkow na jadnakej rowninje ze wšymi drugimi aktiwami serbskeje ciwilneje towarišnosći sobu statkowaś. Pśi tom móžo iniciatiwa se wě ceło samostatnje za swóje ideje ‘serbskego parlamenta’ wabiś.Až doněnta wužywany argument pśeśiwo cłonkojstwoju w Domowinje dla njedosegajucego źělenja mócow njejo plawzibelny a pśeznanjecy: Pla togo wót jano pór hundert luźi na priwatnopšawniskem zakłaźe wólonego gremija z mjenim “Serbski sejm” njejadna se widobnje wó parlament, pśeto njama žedneje financneje respektiwnje regulěrujuceje kompetence, a njama teke žednogo zjawno-pšawniskego statusa. Lěc wětšyna serbskego luda wiziju takego swójskego parlamenta pódpěrujo, móžo se jano w serbskej ciwilnej towarišnosći samej wujasniś, kótarejž dwěsćě zjadnośenjow w Domowinje pód jadym kšywom diskutěrujo.Wokrejs Dubje-Błota a město Lubin stej źinsa jasny signal zwězanosći ze serbskimi nastupnosćami stajili. To se maka z našym procowanim za mócnjejšeju regionalizaciju spěchowanja našeje rěcy a kultury: Zmócnjenje lokalneje wjelerakosći a nałogow jo rownocasnje žywjeński eleksěr za serbske rěcne rumy na městnje, kótarež comy zasej wóžywiś – ako wósebne awtentiske znamje regionalneje identity. Błota su a wóstanu jědrowy serbski rum a buźo teke w našej towarišnosći w pśichoźe hyšći wětšu rolu graś.”Katrin Šwjelina, cłonk zwězkowego pśedsedaŕstwa a pśedsedaŕka Rady za serbske nastupnosći Bramborskeje, jo groniła k aktualnym kubłańsko-politiskim pšašanjam w Dolnej Łužycy ze serbskego wiźenja: „Smy w dobrych, z wobeju bokowu konstruktiwnych rozgronach z ministerstwom naše naraźenja gótowali, pśesajźenje do statnych póstajenjow njamóžo pak nadawk cesnoamtskich gremijow byś. Pó rozgronje w ministarstwje za kubłanje młoźinu a sport z ministarku Ernst wó SoWSchV se naźejamy dłujko lětnego wobźěłańskego procesa dla, až zastojnstwo we pśedpismo časowe blisko dostanjo my, kótarež se za źěło w šulach ze serbskeju wučbu góźi, praktikabel a jo a jo dosć derje wusměrjone na našu rěčnu situaciju.” Beata Brězanowa, wjednica Rěcnego centruma WITAJ, jo informěrowała wó wšakorakich projektach: wó kursach dolnoserbšćiny za wótkubłaŕki w źiśownjach, kótarež se kužde lěto wotměwaju, wó pśigótach na Dny muzejow w gódownem casu za wšykne wukniki 3. lětnika, kenž serbšćinu wuknu, a wó prezentaciji digitalnego projekta “Kšac po kšacu – serbski wuknuś & pšawopis a gramatik” 23. nowembera na Dolnoserbskem gymnazijumje.