Na swojim wuradźowanju w Budyskim Serbskim domje wobkrući prezidij Domowiny srjedu wječor, 4.5., pola załožby zapodatej próstwje třěšneho zwjazka w ramiku spěchowanskeho programa „Serbska rěč a kultura w strukturnej změnje”, kotryž ma wona za sakski bok wobhospodarjeć. Domowinje dźe wo tworjenje syće za regionalnu identitu a serbsku rěč a wo efektiwnu koordinaciju procesa změny strukturow wosebje za wožiwjenje serbskich rěčnych rumow. W Braniborskej wobsteji hižo dlěje towaršnostny konsens wo šěsć serbskich wulkoprojektach, mjez druhim „Zorja” za rewitalizaciju delnjoserbšćiny.

Městopředsyda Domowiny, dr. Hartmut Leipner namjetuje, w Braniborskej wutworić centralne městno, kotrež měło zjawnu dwurěčnosć w komunach koordinować. Z tym měło so dźěło wosebje za komuny wolóžić, kotrež hustodosć wědu wo přełožowarskich posłužbach nimaja.  To je wuslědk přemyslowanjow w zwisku z njedawnym předstajenjom serwisoweho běrowa za serbšćinu w komunalnych naležnosćach w zwjazkowym předsydstwje Domowiny. Běrow je w nošerstwje třěšneho zwjazka a financuje so ze srědkow serbskeho komunalneho programa Sakskeje. Braniborska financuje přidatne městno pola Serbskeho instituta za delnjoserbske přełožki w zwisku ze zjawnym e-governmentom.

Prezidij namjetej hospodarskeho wuběrka Domowiny hladajo na móžne składowanje atomowych wotpadkow we Łužicy přihłosuje, zo njech zwjazkowe předsydstwo hromadźe z dalšimi akterami politiski signal da. Předsyda Domowiny je hakle njedawno na naprašowanje medijow poziciju narodneje organizacije wobkrućił, zo je Łužica dosć a nadosć za wudobywanje brunicy a změnu dotalneje industrijneje monostruktury na so brać dyrbjała.

Předsyda Domowiny, Dawid Statnik, informowaše wo aktiwitach Domowiny w zwisku z aktualnym wubědźowanjom wo spěchowanje wulkoslědźenišća we Łužicy. W Sakskej so tučasu šěsć projektow wo srědki požada. Dwaj projektaj stej so kruće na Łužicu wusměriłoj. Tak je předsyda Domowiny projekt „Němski centrum za astrofyziku” z listom podpěrał, wšako skići planowana infrastruktura za měrjenje grawitaciskich žołmow wjele nowych dźěłowych městnow w serbskich wjesnych kónčinach. Nawodnica Rěčneho centruma Witaj (RCW), dr. Beata Brězanowa, je druhemu projektej „Łužica Art of Building” ideju mjezynarodneho rěčneho centruma Budyšin přidźěłała.

Přihotujo wurjadnu hłownu zhromadźiznu spočatk junija je prezidij naćisk změnow wustawkow Domowiny schwalił. Z tym wotpowěduja žadanjam ze stron hamtskeho sudnistwa w Drježdźanach, kotrež wustawki towarstwow juristisce pruwuje. Zdobom je rozsudźił, zo wotměje so wurjadna hłowna zhromadźizna w prezency pjatk, dnja 3.6.2022, w 17:00 hodź. w Choćebuzu.

Čłonojo prezidija su doporučenja kulturneho wuběrka Domowiny załožbowej radźe za twarsku koncepciju Serbskeho foruma wědy přiwzali. W srjedźišću steji „sylniša widźomnosć serbskeho kulturneho herbstwa” w ramiku pře- a nowotwarow na Lawskim arealu w Budyšinje. Wuběrkownicy su w zjimanju swojeho wosomstronskeho spisa pominali, serbsku ciwilnu towaršnosć a wjesne muzeje bóle při planowanju wobkedźbować, zo by nowe stejnišćo wosrjedź Budyšina zdobom serbskim akteram w regionach poboku było.