Za wólby organow Domowiny na hłownej zhromadźiznje předleži mjeztym 31 kandidaturow. To je srjedu wječor prezidij třěšneho zwjazka na swojim online-posedźenju na wědomje brał. Znowa kandidujetaj předsyda Dawid Statnik a městopředsyda Marko Hančik, prěni raz kandiduje za městopředsydu dr. Hartmut Leipner. Župa Dolna Łužyca budźe swojich kandidatow za šěsć městnow w Zwjazkowym předsydstwje na swojej župnej hłownej zhromadźiznje pjatk za tydźeń wolić.

Wólbne kopolaki k serbskim naležnosćam

Prezidij je namjet za dnjowy porjad konstituowaceho posedźenja noweho zwjazkoweho předsydstwa 19. junija w Budyšinje z digitalnym přistupom po hłownej zhromadźiznje w Slepom 12. junija wobzamknył. Zdobom je so prezidij wólbnym kopolakam stronam a kandidatam za zwjazkowy sejm wěnował a prašenja za wobkedźbowanjom zajimow serbskeho ludu wosebje w dobje změny strukturow rozjimał. Nimo toho chcedźa prěni raz krótko-wideja předsydy z jednotliwymi direktnymi kandidatami šěrić, w kotrychž su politikarjo z konkretnymi serbskimi naležnosćemi wosobinsce konfrontowani a maja bjezposrědnje wotmołwjeć.   

Serbja w europskej a zwjazkowej politice

Na zetkanju dźěłoweje skupiny FUEN – Non-kin-state 27.5. (narodne mjeńšiny bjez tak mjenowaneho maćerneho kraja) chce Domowina projekt „Zorja” (https://www.zorja.org/) za rewitalizaciju delnjoserbšćiny předstajić. Dale su čłonojo prezidija wobsahowje přichodne posedźenje Poradźowaceho wuběrka za prašenja serbskeho ludu poboku Zwjazkoweho ministerstwa nutřkowneho přihotowali. Premjera budźe na digitalnym wuradźowanju wuběrka 22. junija wobdźělenje serbskeju młodostneju.