Wutoru nawječor je so 24 čłonow serbskich gremijow w digitalnym zetkanju, kotrež je předsyda Domowiny, Dawid Statnik, moderował, wo aktualnym połoženju serbskeho ludu w procesu změny strukturow wuměniło. Zastupjerjo zwjazkoweho předsydstwa Domowiny, serbskeju radow Braniborskeje a Sakskeje, załožboweje rady a parlamentariskeje přirady załožby su so w dwuhodźinskej ćiłej diskusiji na dalše pokročowanje dojednali.

Debatu zjimajo so Dawid Statnik wupraja: „Konsens wobsteji, zo je naša rěč najbytostniši wuraz serbskeje narodneje identity a zo su regionalne rěčne rumy jeje fundament. Kak móžemy je wosebje w Delnjej a srjedźnej Łužicy, ale tež w narańšich Serbach Hornjeje Łužicy dale a lěpje wožiwjeć, je prašenje konkretnych wšelakich prioritow w regionach. Wo tym trjebamy šěršu zjawnu diskusiju, kotruž chcemy hromadźe nastorčić. Widźimy na přikładźe projekta ,Zorja’ za zaměrnu rewitalizaciju delnjoserbšćiny, zo rostu dobre ideje najwunošnišo z praksy bazy, kotraž je zdobom wotewrjena za inspiraciju z nazhonjenjow druhich.”

Za tutu diskusiju trjebamy, tak běše konsens wobdźělnikow, nowe – tež digitalne – formaty stajneje wuměny. To chcedźa woleni čłonojo zamołwitych serbskich gremijow dale aktiwnje přewodźeć. Předsydce a předsydźa tutych pjeć gremijow su sej tohodla předewzali, z dalšeje diskusije praktiske konkluzije ćahnyć. Statnik: „Wšitcy su sej přezjedni, zo je historisce jónkrotne dobre materielne wuhotowanje serbskeho narodneho dźěła dobry zakład, přichodne wuwiće Serbstwa w kooperaciji do horšce brać.”  

So wě, zo steji předsyda Domowiny za Waše naprašowanja ke dispoziciji.