Póndźelu popołdnju je so na žurli Serbskeho domu w Budyšinje „fachowa komisija za serbske narodne herbstwo” schadźowała. W srjedźišću třećeho wuradźowanja gremija pod režiju wuběrka Domowiny za kulturu a wuměłstwo steješe přednošk wo nowym mjezynarodnym online-archwije „RomArchive“ w nošerstwje dokumentaciskeho a kulturneho centruma němskich Sintow a Romow. Tón projekt, kotryž bu lětsa z „Grimme Online Award” w kategoriji „wěda a kubłanje” wuznamjenjeny, je André Raatzsch předstajił. Wón je nawoda referata „dokumentacija” nošerja „RomeArchive“.Jan Bělk, předsyda wuběrka Domowiny za kulturu a wuměłstwo, so po dźěłowym wuradźowanju ze zastupjerjemi serbskich inistitucijow a załožby wupraja:„Dotal njeeksistuje centralny register cyłeho serbskeho kulturneho herbstwa wšěch wobłukow. Tohodla hrozy strach, zo so wjele hódnotow wosebje na wsach dokoławokoło domizniskich stwow a małych muzejow a runje tak na polu serbskeho profesionelneho wuměłstwa přichodnje pozhubja. Tomu chcemy zhromadnje zaźěwać. Hustodosć ani znate njeje, kotre drohoćinki je naš lud nadźěłał, dokelž njejsu powšitkownje přistupne. Tohodla chcemy dotalny serbski kulturny archiw Serbskeho instituta na centralny žiwy pomjatk serbskeho ludu wutwarjeć.Nam je runja Romam wažne, zo tón epochalny nadawk sami w horšći mamy a jako Serbja zamołwitosć za pěstowanje zańdźenosće, přitomnosće a přichoda přewzamy. ,RomArchive’ nam pokazuje, zo njeńdźe jeničce wo składowanje informacijow, ale tež wo nowe žiwe formaty prezentacije wobsahow z pomocu angažowanych akterow.  Na zakładźe naćiska kulturneho referenta Domowiny, Clemensa Škody, zaběramy so z konkretnym kročelemi zwoprawdźenja, zo bychmy prawje bórze přirunujomny ,pomjatk ludu’ měli.Ze zrjadowanjom swojeho kulturneho herbstwa sobu wo tym rozsudźimy, kotrych wobrazow budźe přichodnje w towaršnosći wo Serbach. Dźakowano inspiraciji ze stron ,RomArchive’ smy dźensa krok dale šli. Nětko so naš apel na profesionelnje skutkowacych fachowcow, nawodow kaž tež politiskich akterow měri, iniciatiwu skutkowanja za wobłuk ,narodneho kulturneho herbstwa Serbow’ přewzać, so zhromadnje a w stajnym mjezsobnym wothłosowanju za nowe, do přichoda nošne struktury zasadźeć.”        Informacija wo „RomArchive”: https://blog.romarchive.eu/deutsch-2/wer-wir-sind/André Raatzsch – wosoba a skutkowanje: https://blog.romarchive.eu/deutsch-2/projektbeteiligte/photography-ii-andre-jeno-raatzsch/Foto: Dawid Statnik, předsyda Domowiny, a Jan Bělk, předsyda kulturneho wuběrka, gratulujetaj Andréjej Raatzschej (srjedźa) za wuznamjenjenje „RomArchive“ – z knihu Jurja Brězana „Krabat oder Die Bewahrung der Welt“