Župne předsydstwo župy „Michał Hórnik” Kamjenc je na swojim posedźenju srjedu wječor, 20.4., Spěchowanske towarstwo Serbskeje wyšeje šule „Michał Hórnik” Worklecy (https://www.schule-raeckelwitz.de/podperacy-towarstwo-foerderverein) do župy přiwzało. Wo tym informowaše regionalna rěčnica Domowiny, Katharina Jurkowa. Hakle loni je čłonstwo župy wo młodźinskej klubaj Konjecy-Šunow a Pančicy-Kukow rozrostło.

Předsydka noweho sobustawskeho towarstwa je Antje Bobcyna z Worklec. Nimo kulturnych wjerškow šule stara so towarstwo mjez druhim tuchwilu wo podpěru při wuhotowanju šule za šulerku z wosebitej chorosću. Dalšej wuslědkaj wuradźowanja župneho předsydstwa: Kubłanska jězba župy wjedźe lětsa w oktobrje do Namysłowa. Kónc nowembra so župna kermuška ze skupinu „Po štyrjoch” wotměje.