Župne předsydstwo župy „Michał Hórnik” witaše na swojim posedźenju póndźelu (31.1.) wječor w Chrósćicach nowu jednaćelku Domowiny, Judit Šołćinu, a schwali lětuši plan dźěławosćow. K tomu słušeja mjez druhim schadźowanka za swójby, projektowe dny za šulerjow pod temu „Zejler/Kocor“ we Wojerecach, wopyt festiwala dudakow w Slepom, filmowe wječory a kulturna kermuša župy. Prěnje zarjadowanje budźe srjedź měrca přednošk za wuměnkarjow w Chrósćicach, informowaše regionalna rěčnica Katharina Jurkowa.

Cyłe lěto chcedźa w kooperaciji z młodźinskimi klubami, socialnym teamom Rěčneho centruma Witaj, towarstwom Pawk a dalšimi partnerami stajnje młodźinske dźěło podpěrować. Tež znowazarjadowanje a modernizowanje muzeja Ćišinskeho změja běžnje na starosći. Wjesni chronisća župy zetkawaja so dwójce wob lěta, přednoški wo wšelakich stawizniskich temach Trudla Kuringowa a Alfons Kuring skupinam, towarstwam a zajimcam poskićujetaj. Tež z wuměnu hotowarničow chce župa pokročować, w srjedźišću steji dokumentowanje wosebitosćow zdrasćenja.

W ramiku „Lěta župow” móža so šulerjo z Worklec na projektowym dnju na zakładnej šuli w Slepom wobdźělić, tak wuměnu šulerjow składnostnje jubileja 750 lět Slepoho podpěraja. Zdobom budźe župa kubłanskej referentce Domowiny a Serbskemu šulskemu towarstwu při zarjadowanju kubłanskich kołow poboku, kotrež so dalewuwiću kubłanja dźěći a młodźiny wěnuja.  Wažne wostawaja župje skrućenje lětdźesatki trajacych přećelskich stykow do Pólskeje, tohodla so delegacija župneho předsydstwa na přeprošenje Rady města Namysłowa do susodneho kraja poda. 

Jednohłósnje so župne předsydstwo za wurjadnu hłownu zhromadźiznu Domowiny za zdokonjenje płaćiwosće modernizowanych wustawkow třěšneho zwjazka wupraji.

Wobraz: Nowa jednaćelka Domowiny Judit Šołćina (3.w.p.) a županka Diana Wowčerjowa w kole župneho předsydstwa. Foto: Župa „Michał Hórnik” Kamjenc