Ze spominanjom na załoženje Domowiny před 105 lětami, dnja 13. oktobra 1912, zahaji so posedźenje Zwjazkoweho předsydstwa Domowiny dnja 10. nowembra we Wojerecach. Předsyda Domowiny Dawid Statnik poda wo tutym za Serbow wuznamnym podawku stawizniske informacije. Rěčnica župneho předsydstwa župy “Handrij Zejler” Wojerecy Christina Šołćina informowaše wo skutkowanju župy, wo stykach k šulam a towarstwam a wo mnohostronskich zarjadowanjach za šulerjow a Domowinjanow w Domowinskim domje na Drježdźanskej 18.

Dawid Statnik a župan Wylem Janhoefer podpisaštaj aktualizowane kooperaciske dojednanje mjez Domowinu jako třěšnym zwjazkom a Domowinu – Župa Delnja Łužica. Wone wobsahuje mjez druhim, zo so prezidij zwjazkoweho předsydstwa dwójce wob lěto ze župnym předsydstwom zetka. Prěnje zrěčenje bě so 2013 podpisało.

Dalša tema bě přirjadowanje nadawkow dźěłowych směrnicow Domowiny, kiž je zašła hłowna zhromadźizna wobzamknyła, šěsć dźěłowym wuběrkam zwjazkoweho předsydstwa. Prezidij dósta nadawk, namjety změnow přirjadowanja z předsydami wuběrkow dojednać. Mjeztym su wšě wuběrki swoje dźěło zahajili. Zwjazkowe předsydstwo powoła Hanku Rjelcynu, Utu Henšelowu a Geralda Schöna jako fachowcow do wuběrka za kulturu a wuměłstwo, Marka Njeka jako fachowca do wuběrka za kubłanje a wobkrući Marka Klimana jako předsydu wuběrka za hospodarstwo a infrastrukturu.

Dawid Statnik informowaše wo stawje zběranja podpismow za Europsku wobydlersku iniciatiwu Minority SafePack, štož rěka serbsce, tak Bjarnat Cyž, “My Serbja Podpěramy Iniciatiwu”. Přitomni běchu sej přezjedni, zo je za wuspěch tuteje iniciatiwy trjeba, socialne syće runje tak kaž pisomne informacije resp. lisćiny wužiwać. Domowina planuje wšelake wabjenske akcije, kaž krótku filmowu sekwencu, póstowe kartki a wosobinske wabjenje z podpismowymi lisćinami na zarjadowanjach. Kóždy, kiž chce so wobdźělić, je wutrobnje witany a móže na přikład pod www.minority-safepack.eu swój hłós direktnje wotedać. Aktualnje předleži něhdźe 100.000 digitalnych podpismow.

Dale wabješe předsyda Domowiny za to, kmanych kandidatow za poradźowace sobudźěło w šulskich konferencach na serbskich šulach a na šulach ze serbskorěčnym poskitkom w Sakskej namakać. Lětsa nowelěrowany Sakski šulski zakoń zmóžnja tajke poradźowace sobudźěło. Rozsud, štó budźe w šulskich konferencach jako zastupjer Domowiny skutkować, twori zwjazkowe předsydstwo.

Zwjazkowe předsydstwo wobzamkny plan swojeje klětušeje dźěławosće kaž tež terminow prezidija. Prezidij zetka so měsačnje a zwjazkowe předsydstwo dwuměsačnje. Přichodne posedźenje zwjazkoweho předsydstwa wotměje so 23. februara w Choćebuzu. Tema budźe tam mjez druhim serbskorěčne kubłanje w Delnjej Łužicy.

D. Statnik informowaše wo wopyće noweje kubłanskeje ministerki w Braniborskej, Britty Ernst, kiž wopyta 10. nowembra na přeprošenje staršiskeje iniciatiwy Delnjoserbski gymnazij w Choćebuzu. W rozmołwje ze zastupjerjemi Serbow ministerka přilubi, zo so Serbske šulske postajenje, kiž bě w zašłych měsacach wjele kritiki a diskusijow wubudźiło, tuchwilu njeda do kabineta, ale zo so hišće raz wo nim přemysluje, štož so jara witaše. Zwjazkowe předsydstwo sej žada, zo so naćisk do schwalenja ze zastupjerjemi Serbow wothłosuje.

Wjednica Rěčneho centruma WITAJ dr. Beata Brězanowa informowaše wo fachowym dnju 2plus dnja 21. oktobra w Chrósćicach. Po diskusiji na posedźenju zwjazkoweho předsydstwa doporuči so, zo kubłanski wuběrk wotewrjene dypki z diskusije zběra a so z nimi zaběra.