Srjedu wječor, 30. oktobra, zeńdźe so Zwjazkowe předsydstwo Domowiny w Chrósćicach k wurjadnemu posedźenju. Hłowna tema bě nominowanje štyrjoch kandidatow za nowu Saksku serbsku raduna dobu 2019-2024, kiž ma Sakski krajny sejm wolić.

Župy a towarstwa běchu šěsć kandidatow namjetowali, kiž so na posedźenju předstajichu. W tajnych wólbach rozsudźi so zwjazkowe předsydstwo za Juliana Nyču, Dawida Statnika, Marka Suchya a Dianu Šołćinu. Cyłkownje ma Sakska serbska rada pjeć čłonow: nimo štyrjoch wot Domowiny namjetowanych přisłuša jej jedyn komunalny zastupjer ze serbskeho sydlenskeho ruma. 

Zastupowacy jednaćel Domowiny Marcus Końcaŕ informowaše wo wuslědkach wólbow Rady za naležnosće Serbow při Braniborskim krajnym sejmje, kiž běchu so jako listowe wólby přewjedli. Nowi čłonojo Braniborskeje serbskeje rady su Dieter Freihoff, Uta Henšelowa, městopředsyda Domowiny William Janhoefer, Delia Münchowa a čłonka Zwjazkoweho předsydstwa Domowiny Kathrin Šwjelina, kotraž bu zdobom jako předsydka rady wuzwolena. Marcus Końcaŕ přeješe wšěm wolenym wjele zboža a wuspěcha při jich skutkowanju. 

Nastupajo naćisk změnjenych wustawkow Domowiny a zahajenje jeho diskusije w župach a towarstwach informowaše předsydka prawniskeho wuběrka Kathrin Suchec-Dźiwsławkowa, zo chce wuběrk na přichodnym posedźenju Zwjazkoweho předsydstwa prěni namjet předpołožić. Wón ma być zakład za zjawnu diskusiju.