Po mnohich lětach přestawki woswjeći ewangelska wosada w Hodźiju lětsa zaso swoju kermušu. Z dwurěčnej Božej mšu we wosadnej cyrkwi Swjateho Pětra a Pawoła so swjedźeń na wčerawšej njedźeli zahaji. Hodźijski farar a serbski superintendent Christoph Rummel wuzběhny w swojim prědowanju, zo je Hodźijska cyrkej hižo “wjacore lětstotki dołho městnosć, w kotrež so serbsce a němsce spěwa a modli”. To zwobrazni tež pisany swjedźeń, kotryž so po Božej mši zahaji.

Zamołwići cyrkwinskeje wosady a Hodźijskej gmejny stej zhromadnje z dalšimi partnerami wotměnjawy program ze serbskim a němskim spěwanjom, hudźenjom ale tež rejowanjom přihotowałoj. Nimo Myšečanskeje pěstowarnje, Zakładneje šule Hodźij kaž tež Hodźijskeje dźěćaceje šole běchu mnohe towarstwa do programa zapřijate.

Tež Raphaela Wićazowa, kotraž skutkuje w Hodźiju jako rěčna motiwatorka Domowiny w projekće ZARI, přihoty kermuše a swjedźeń aktiwnje sobu podpěraše. Při jeje stejnišću móžachu sej dźěći butony zhotowić a so připódla ze serbskej rěču zeznajomnić. W rozmołwje ze staršimi móžeše wona wo swojej dźěławosći informować a pokiwy za nawuknjenje serbšćiny posrědkować.

Jedyn wosebity poskitk bě dźěłarnička wo serbskich ludowych rejach. Někak 40 wopytowarjow nawukny pod fachowym nawodom knjeza Michaela Apelta zakłady serbskich rejow. Štóž chcyše, móžeše nawuknjene znajomosće potom tež hnydom na zakónčacych kermušnych rejach w swjedźenskim stanje nałožować.