W časach politiskich změnow je čim rozsudnišo, naše demokratiske hódnoty zakitować a přichod aktiwnje wobwliwować. Wólby do zwjazkoweho sejma su rozsudna šansa, so za mnohostronsku, sprawnu a wotewrjenu Němsku zasadźić – za Němsku, w kotrejž so prawa Serbow a wšěch awtochtonych mjeńšin česća a škitaja.

Domowina namołwja tuž wšě wólbokmane Serbowki a wšěch wólbokmanych Serbow, swoje wólbne prawo wužiwać. Informujće so, kotre strony a kandidatki a kandidaća so jasnje a wěryhódnje k škitej serbskeje identity, rěče a kultury wuznawaja. Je wažne, zo so naše naležnosće, kotrež su w aktualnym zakładnym pismje mjeńšinoweje rady sformulowane – zhromadnje ze wšěmi awtochtonymi narodnymi mjeńšinami w Němskej – w přichodnej legislaturnej periodźe słyša a aktiwnje podpěruja.

Aktualne politiske wuwića, wosebje zesylnjenje prawicarstwa, nas starosća. Antidemokratiske prudźenja wohroža naše zhromadne hódnoty a mnohotnosć, kotraž našu towaršnosć wučinja. Dyrbimy tomu zadźěwać. Demokratija je žiwa wot sobuskutkowanja, wot zmužitosće a jasnych pozicijow. Pokazajmy zhromadnje, zo stejimy za wotewrjenu, mnohostronsku a česćownu towaršnosć.

Dźiće wolić. Pokažće z Wašim hłosom, zo stejiće za demokratisku Němsku a za sylne zastupnistwo Serbow w politiskim rumje. Kóždy hłós liči.

Domowina – Zwězk Łužyskich Serbow | Zwjazk Łužiskich Serbow