Pod nawodom społnomócnjeneho zwjazkoweho knježerstwa za prašenja wusydlencow a narodne mjeńšiny dr. Bernda Fabritiusa wuradźuje 19. nowembra w Čornym Chołmcu poradźowacy wuběrk za prašenja serbskeho luda. Tutón wuběrk po boku Zwjazkoweho ministerstwa za nutřkowne naležnosće zaruća serbskemu ludej zwisk ze zwjazkowym knježerstwom a sejmom.Na jutřišim posedźenju wobdźěla so jako zastupjerjo serbskeho luda ze stron Domowiny předsyda Dawid Statnik, městopředsydaj Marko Hančik a Wylem Janhoefer, čłon zwjazkoweho předsydstwa Damian Dyrlich kaž tež dalši młodostni. Załožbu za serbski lud zastupujetaj předsydka załožboweje rady Susann Šenkec a direktor Jan Budar.Nimo zastupjerjow krajow Sakska a Braniborska su zapósłancy Zwjazkoweho sejma Torsten Herbst (FDP), Stephan Kühn (Zwjazk 90/Zeleni) a Karsten Hilse (AfD) swoje wobdźělenje připrajili.Pokiw za žurnalistow/medije:Posedźenje poradźowaceho wuběrka za prašenja serbskeho luda započnje so w 12.30 hodź. w Krabatowym młynje a njeje zjawne.Dr. Fabritius kaž tež zastupjerjo serbskeho luda budu něhdźe wot 11.30 hodź. tam a steja za interviewy k dispoziciji.