Z wulkim spodźiwanjom je prezidij Domowiny na swojim posedźenju dnja 01.03.2023 w Budyšinje list direktora załožby za serbski lud z dnja 08.02.2023 na wědomje wzał. W lisće je projektowych nošerjow wo nowych zarjadniskich předpisow k Hospodarskemu porjadej Sakskeje za spěchowanje projektow a institucijow (§ 44 SäHO) informował. Na tutym zakładźe připowědźa, zo dyrbjeli projektowi nošerjo w přichodźe “detailěrowany finančny plan z dochodami a wudawkami cyłeho lěta za cyłkowne towarstwo a wotpowědny aktualny kontowy wućah wšitkich kontow projektoweho nošerja” podać, požadali so wo spěchowanske srědki za projekty. Njepřipóznaje-li załožba we wuslědku wuwzaćny pad, bychu so do přewjedźenja projektow jeničce hišće 40% požadanych pjenjez wupłaćili. Z tym je po měnjenju Domowiny wulki dźěl čestnohamtskich aktiwitow wohroženych. Domowina wočakuje, zo załožbowy zarjad wotpowědne připowědźenje cofnje. Za nošerjow serbskich projektow prosymy wo spěšne, zwjazowace a njeběrokratiske rjadowanje na dobro serbskich projektow, zo bychu so po planje zrealizować móhli wobkedźbujo při tym sakske předpisy.

Přihoty hłowneje zhromadźizny dale pokročuja. Tak je prezidij Domowiny aktualny naćisk dźěłowych směrnicow za dobu 2023 do 2025 wothłosował. Tutón ma so nětko čłonskim towarstwam a župam předpołožić, zo bychu so na 23. hłownu zhromadźiznu, dnja 22.04.2023, přihotować móhli, na kotrejž maja so směrnicy wobzamknyć. Tež Zwjazkowe předsydstwo ma dnja 17.03.2023 naćisk wobjednawać.

Dale je prezidij 4 zastupjerjow Serbskeho młodźinskeho towarstwa Pawk na jutrowny seminar MENS w Gradišću w času wot 31. měrca do 07. apryla delegował.

Runje tak je wobzamknył, Zwjazkowemu předsydstwu namjetować wutworjenje wuběrka “Europeada 2024”. Wuběrk, wobstejacy z 10 wosobow Hornjeje a Delnjeje Łužicy, ma přihotować wobdźělenje Serbow na Europeadźe w lěće 2024.

Prezidij bjerje z wjeselom na wědomje, zo bě Serbska rada Sakskeje ze žadanjom wo nowej jednaćelnju wuspěšna a přeje skrućenej Serbskej radźe pod nowym předsydu Marka Sucheho spomóžne dźěło w naležnosćach, kotrež prawa serbskeje ludnosće w Sakskej nastupaja.