Napominanje k wólbam

Až smějomy wóliś jo wusoke demokratiske pšawo a rownocasnje zagronitosć, kótaraž nam zmóžnijo, pśichod našogo kraja sobu wugótowaś. 1. septembra smy w Sakskej a 22. septembra w Bramborskej napominane wólit hyś.

Domowina, ako kšywowy zwězk Łužyskich Serbow, zasajźujo se za spěchowanje a šćit serbskeje rěcy, kultury a identity. Naša zgromadnosć jo žywa wót wšakorakosći, tolerance a respekta napśeśiwo drugim kulturam. Toś te gódnoty su zakład za pokojnu zgromadnosć.

Napominamy wólaŕki a wólarjow, pśi swójom rozsuźenju na wólbnem dnju dokradnje glědaś, kótare partaje a kandidaty za wótwórjonu, demokratisku a tolerantnu towarišnosć stoje. Wužywajśo swój głos za tych, kótarež se ekstremizmoju, diskriminaciji a winikojstwoju cuzym napśeśiwo stajaju a za tych, kenž kśě pšawa mjeńšynow šćitaś a spěchowaś.

Jo naša zgromadna zagronitosć, pśichod našogo kraja sobu wugótowaś a pśi tom zawěsćiś, až wóstanjotej Sakska a Bramborska městno, źož móžotej serbska rěc a kultura žywej wóstaś. Wuzwólśo toś z rozymom a w zmysle wótwórjoneje, pluralistiskeje towarišnosći.

Politiske źěło do wólbow Sakskego ako teke Bramborskego krajnego sejma

Ako kšywowy zwězk smy w Sakskej ako teke w Bramborskej pšašanja wósym politiskim stronam (SPD, Lěwica, Zelene, AfD, Lichotne wólarje, FDP, BSW, CDU) k serbskim temam stajili.

Zaměr politiskego źěła Domowiny do wólbow do krajneju sejmowu jo naše serbske wupominanja we wólbnem wójowanju zjawnosći pśedstajiś a partaje ako teke jich kandidatow we wólbnych wokrejsach Łužycy za naše pominanja sensibilizěrowaś.

“Zwěsćujomy, až se mimo AfD w Sakskej a FDP w Bramborskej, wšykne politiske strony serbskemu ludoju w jich wólbnych programach pśiwobrośiju. We wopśimjeśach pak su wjelike rozdźěle. Te jadne serbski lud jano na kulturu reducěruju. Druge naraźiju konkretne napšawy za pólěpšenje situacije, na pśikład w palecej temje šulstwo”, tak pśedsedaŕ Domowiny Dawid Statnik.

Wótegrona na naše wólbne kopolaki za Saksku a za Bramborsku, kótarež smy w nalěśu w zjawnem napominanju zběrali, namakajośo na našej webstronje. Wušej togo smy zestajali zespominanje serbskich temow we wótpowědujucych wólbnych programach sakskich a bramborskich politiskich stronow.

Domowina jo mimo togo do wólbow w Sakskej tśi wólbne forumy pśewjadła. Na toś tych zarědowanjach jo se wukristalizěrowało, až njejsu wšykne kandidaty wó serbskich nastupnosćach informěrowane. Źělnje kandidatki a kandidaty programy swójskich politiskich stronow njeznaju.

Wólbny forum w Bramborskej buźo 10. septembra zeg. 18 w sportlaŕskem domje w Janšojcach.

Stojmy pśed rozsudnymi wólbami do pśichoda w Sakskej a Bramborskej. Grozy tšach, až změju wuslědki wólbow negatiwne slědy za mjeńšyny* w Nimskej a z tym teke za nas Serbow. Ekstremizm kuždegožkuli raza zasuźijomy. Gaž dobydnu ekstremistiske strony, gaž zmócniju se pšawicaŕske strony, škóźi to Serbam.

Domowina jo w pśedpólu wólbow w zwisku z wólbnymi forumami w rozgronje z kandidatami a kandidatkami stronow Lěwicy, AfD, Lichotnymi wólarjami, BSW, FDP, CDU, Zelenymi a SPD. Dalej smy wjadli rozgrona w Górnej a Dolnej Łužycy, mjazy drugim ze zastupnikami Lěwice, Zelenych, SPD a CDU. Pókšacujomy z rozgronami dalej do ako teke pó wólbach.

________________________

* W Nimskej bydle styri pśipóznate awtochtone, narodne mjeńšyny a ludowe kupki: dańska mjeńšyna, friziska ludowa kupka, nimske Sinti a Romy a Łužyske Serby.