Čłonki a čłonojo Zwjazkoweho předsydstwa Domowiny zaběrachu so na swojim dźensnišim posedźenju w Delnjoserbskim internaće w Choćebuzu z přihotom swojeje 23. hłowneje zhromadźizny. Tuta budźe 05.04.2025 w rumnosćach Serbskeho ludoweho ansambla w Budyšinje. 

Wotpowědnje modernemu ansamblu ma tež lětuša hłowna zhromadźizna wotměnjawa być. „Chcemy postrowne słowa na najwažniše wuprajenja wobmjezować“, tak předsyda Dawid Statnik.

Dale budźe so rozprawa dźěławosće Domowiny – hinak hač w zašłosći – interaktiwnje podać. „Za to wužiwaja so nimo žurle ansambla tež dalše rumnosće. Chcemy dźěławosć interaktiwnje předstajić a delegatkam a delegatam móžnosć skićić, do rozmołwy přińdź.”

Njezměniła je so ličba mandatow za wólby hłowneje zhromadźizny, kotrež so po turnusu lětsa zaso wotměja. Jedyn mandat za župu a towarstwo je wěsty. Na kóžde 600 čłonow wobsteji prawo na dalši mandat. Na hłownej zhromadźiznje wola so předsyda/předsydka a wotpowědny zastup, čłonki a čłonojo zwjazkoweho předsydstwa, rewizijneho kaž tež změrcowskeho wuběrka.

Ličba čłonkow a čłonow Domowiny je na wjace hač 7.600 stupała. Z 2.683 čłonkami a čłonami je župa Delnja Łužica najwjetši cyłk w třěšnym zwjazku.

Dale zaběrachu so čłonki a čłonojo zwjazkoweho předsydstwa ze změnu wustawkow. Zakład za to je wobzamknjenje gremija z junija poslednjeho lěta, w kotrymž so za to wuprajichu, zo njemóža zastupjerjo gremijow třěšneho zwjazka runočasnje funkcionarojo abo kandidaća ekstremistiskich stronow abo skupinow być. Hłowna zhromadźizna ma změny schwalić.

Předsyda wuběrka “programowa diskusija” Damian Dyrlich dźakowaše so wšěm, kotřiž su na programje za přichodnu dobu sobu dźěłali: „Nowy program je krótki a słódki. Zakładne hesła zamołwitosć, wotewrjenosć a zwjazanosć su wostali, dokelž tute Domowinu wučinja.”

Jednaćelka Domowiny předstaji naćisk wo mjezystawje dźěłowych směrnicow Domowiny w lětomaj 2025 a 2026. Čłonki a čłonojo zwjazkoweho předsydstwa maja nětko nadawk, w swojich towarstwach a župach wo tutych diskutować. Na přichodnym posedźenju zwjazkoweho předsydstwa maja so směrnicy schwalić, zo móhli so na hłownej zhromadźiznje wobzamknyć.

Domowina pruwuje móžnosće požadanja na swětowu lisćinu imaterielneho kulturneho herbstwa. Jan Bělk, nawoda kulturneho wuběrka, wuwjedźe wuslědki fachoweje rozmołwy ze Serbskim institutom wo imaterielnym kulturnym herbstwje (ikh). Tute zarjadowanje wuwědomi, zo njeje zapisk w lisćinje ikh Zwjazkoweje republiki Němskeje hišće kwalifikowany. Kulturny wuběrk namjetuje, temu dale wobdźěłać.

Tutón tydźeń je so Rada za serbske naležnosće w Braniborskej konstituowała. “Gratulujemy wolenej čłonce a čłonam, kaž tež předsydźe Marcusej Końcarjej.”, jednaćelka Domowiny Judit Šołćina wuwjedźe. “Tež Sakska Serbska rada je so kónc lěta wot Sakskeho krajneho sejma woliła. Wjeselimy so, zo je krajny sejm tych čłonow wolił, kotrež je zwjazkowe předsydstwo namjetowało.”

Podobnje projektej ZORJA, kotrež delnjoserbsku rěč w Delnjej Łužicy hižo lěto wuspěšnje rewitalizuje, budźe w aprylu program DOMOJ startować, kotryž ma zaměr, hornjoserbšćinu rewitalizować. 12 wobdźělnikow budźe we Wulkich Zdźarach po imersiskim principje pjeć dnjow wob tydźeń intensiwnje hornjoserbsce wuknyć.

Wutrobnje přeprošeni su wšitcy zajimcy na slědowacej zarjadowani:

• “Předstajenje akciskeho plana projekta ZARI” 13.02.2025 18.30 hodź. w Kamjentnym domje w Budyšinje
• “Zorjaki přeproša na Zapust w Dešnje”, 23.02.2025