Dnja 10.08.2018 witaštej ministerski prezident kraja Braniborskeje dr. Dietmar Woidke a krajna zamołwita za naležnosće Serbow, Ulrike Gutheil, zastupjerjow Serbow w statnej kencliji w Podstupimje.Ze stron Domowiny wobdźěleštej so předsyda Domowiny Dawid Statnik a zastupowacy jednaćel Marcus Końcaŕ, předsyda rady za naležnosće Serbow, Torsten Mak a direktor Załožby za serbski lud, Jan Budar. Wjetši dźěl někak hodźinskeje rozmołwy zaběraše so z prašenjemi kubłanja. “Nam bě wažne na to pokazać, zo jeničce cyłotna strategija, z pěstowarnje hač k studijej, k zdźerženju a rewitalizowanju serbskeje rěče přinošuje. Tu widźimy hišće mnoho móžnosćow polěpšenja. Nic jenož wužadanja při zdobywanju přidatneho kubłanskeho dorosta, ale tež prašenje zwjazowacych ramikowych wuměnjenjow a kwalitnych kriterijow nastupajo předšulske a šulske kubłanje, dyrbja so w přichodźe rjadować, zo bychmy nadawkej, kotryž z wustawy kraja Braniborskeje wuńdźe, wotpowědowali.”, tak Statnik.Mjez druhim buchu problemy na přikładźe Delnjoserbskeho gymnazija rysowane. “Gymnazij je po cyłej Braniborskej jenički, na kotrymž so serbska rěč wuči. Njehladajo toho dyrbi spagat mjez kwalitu rěčneho kubłanja a kwantitu ličby šulerstwa zdokonjany być. Tu wočakujemy jasny signal Braniborskeje, zo steji k šulskemu stejišću a ke kwalitatiwnemu posrědkowanju rěče.”, tak Statnik dale.Nastupajo Załožby za serbski lud připowědźichu zastupjerjo Serbow, za přichodne finančne zrěčenje, kotrež by płaćiło wot lěta 2021, wobšěrne přemyslowanje k cilam spěchowanja předpołožić. “W zašłych lětach su so wjacore nadawki přidružili, kotrež njehodźa so w eksistowacych strukturach tak zmištrować, zo bychu narokej wotpowědowali. Tu trjebamy wjace móžnosćow. Tole potrjechi nimo digitalizacije a nowych medijow tež wobšěrny rěčny marketing, zo bychmy rěčne rumy skrućili a dale rozšěrili.”, tak Budar.Dalša tema běše strukturna změna Łužicy. Přezjedni běchu sebi přitomni, zo mataj Zwjazk a Europska unija winowatosć, ramikowe wuměnjenja stworić, kotrež zmóžnja, Łužicu žiwjenja hódnu zdźeržeć a móžnym hospodarskim a socialnym stratam zadźěłać.K tutej temje organizuje Domowina zhromadnje z “Zukunftswerkstatt Lausitz” dnja 13./14.09.2018 na Braniborskej techniskej uniwersiće w Złym Komorowje strukturnu konferencu pod titulom “Quo vadis Łužica“. Dale dźakowaše so Statnik krajnemu knježerstwu za poziciju nastupajo dwurěčne wuhotowanje taflow na awtodróhach w sydlenskim rumje. Tomu předchadźało bě politiske jednanje Serbow na zwjazkowej runinje. Statnik k tym: “Zo rěka Praha němsce Prag a čěsce Praha, to smědźa awtowi šoferojo w Němskej zhonić. Zo eksistujetej we Łužicy dwě runohódnej rěči, Serbšćina a Němčina, pak nic. To njerozumimy.Witamy, zo je so Braniborska na naprašowanje Zwjazka k tomu pozitiwnje a z tym za dwurěčne wutaflowanje awtodróhow wuprajiła.” Tež naspomnjene bu prawo přisłušnikow serbskeho ludu, w Němskej swoje mjeno hamtsce po pismje a/abo rěči serbsce wužiwać. Njeje pak dowolene při kóncowkach swójbnych mjenach žónski sufiks wužiwać, kaž je to pola słowjanskich rěčow z wašnjom. Tu so prawo Serbow, serbske mjeno wužiwać, njepřesadźi. Z přećelnym postrowomZ pśijaznym póstrowomMit freundlichen GrüßenDawid Statnik, předsyda Informacija k foće: Žórło: brandenburg.deNa foće - wot lěwa do prawa: předsyda rady za naležnosće Serbow, Torsten Mak, zastupowacy jednaćel Domowiny, Marcus Końcaŕ, krajna zamołwita za naležnosće Serbow, Ulrike Gutheil, ministerski prezident kraja Braniborskeje dr. Dietmar Woidke, předsyda Domowiny, Dawid Statnik a direktor Załožby za serbski lud, Jan Budar