Składnostnje zahajenja noweho semestra a witanja nowačkow do sorabistiki na Lipšćanskej uniwersiće praješe wutoru, 4.10., předsyda Domowiny, Dawid Statnik, kiž je so kaž kóžde lěto na swjatočnym zarjadowanju wobdźělił a so potom hišće na zwučene wašnje ze studowacymi na bjesadu zetkał: 

„Lipšćanska sorabistika je tradicionelnje mać serbskeho akademiskeho kubłanja. W Drježdźanach so nětko takrjec młódša sotra na dalšu sorabistiku w Sakskej hotuje. A njedawno je nam Japančan prof. Goro Christoph Kimura w Budyšinje w serbskim přednošku zajimawu strategiju za kreatiwnu dwurěčnosć předstajił. Tohodla ja porno serbskej instagram-stronje ,serbskememesoriginal’ dwubój mjez ,dr. Hauke a dr. Edwardom’ wo wukubłanje serbskich wučerjow njewočakuju, ale wobohaćenje, kooperaciju a wudospołnjenje. Rady wězo tež duchowne wubědźowanje, wšako tajke něšto stopnjowanju niwowa tyje.

Trjebamy nuznje zwyšenje niwowa nałožowaneje serbšćiny. Přiběrajcy brach požadarjow za dźěłowe městna z wuměnjenjom wobknježenja dobreje spisowneje serbšćiny a přiwótřene problemy nic naposledk w redakcijach serbskich medijow nam jasnje pokazuja: Tak njepóńdźe dale. Wěcywustojni Europskeje rady su hakle njedawno zwěsćili: Trjebamy wjac móžnosćow, swoju rěč nałožować. Myslu sej, z rěču je to kaž z instrumentom: Dobry zwuk je wupłód wšědneje praksy. Z toho wurosće z mojeho wida tež měritko za to, štož ,serbsku elitu’ mjenujemy: Předawarka w pjekarni, kotraž z kupcami rjenje serbuje, je skerje ,elita’ hač sorabist, kiž našu rěč jenož jako akademiski předmjet wobhladuje. Bohudźak je Lipšćanska sorabistika tradicionelnje a hač do dźensnišeho z čiłym towaršliwym serbskim žiwjenjom studowacych zwjazana, a tule so naša rěč swěru pěstuje.

Sym Lipšćanskej sorabistice dźakowny, zo wona wukonliwje k wukubłanju serbskich wučerkow a wučerjow přinošuje. Zo je so lětsa kóždy štwórty maturant Serbskeho gymnazija w Budyšinje za studij wučerstwa rozsudźił, je dobre znamjo. Witam tež wotewrjenosć sorabistiki studowacym, kotřiž serbsce njemóža, ale su zwólniwi, sej serbšćinu přiswojić, zo bychu za serbske wučerstwo studować móhli. Ale dźakowano slědźenjam Cordule Ratajczakoweje a druhich wěmy, zo nic jenož na gymnaziju z rěčnej integraciju noworěčnikow do našich serbskich kruhow klaca. Přeju sej wjac wotewrjenosće našeho ludu rěčnym migrantam, zo bychmy jich přichodnje lěpje integrowali.”