Přichodny tydźeń přewjedu so w Berlinje za Serbow wšelke wažne terminy.  Srjedu, dnja 07.11.2018 přewjedźe so w ministerstwje nutřkowneho (BMI) implementaciska konferenca k 5. rozprawje Němskeje k ramikowemu zrěčenju k škitej mjeńšinowych rěčow. Mjez druhim wobdźělitaj so na tutym posedźenju předsyda Domowiny, Dawid Statnik a jednaćel Domowiny, Marko Kowar. W druhim dźělu posedźenja tematizuje so młodźinske dźěło. K tutym budźetaj Franciska Albertowa za Delnju Łužicu a čłonka PAWKa Ella Bergerec za Honju Łužicu wo młodźinskich aktiwitach informować.Konferency přizamknje so swjatočnosć składnostnje 30-lětneho wobstaća a skutkowanja społnomócnjeneho zwjazkoweho knježerstwa za wusydlencow a narodne mjeńšiny. Na swjatočnosći wobdźělić budźe so mjez druhim minister nutřkowneho Horst Seehofer a aktualny społnomócnjeny prof. dr. Bernd Fabritius.Štwórtk, dnja 08.11.2018 přewjedu so wšelke zetkanja z politikarjemi, kaž n. př. z čłonom frakcije Zelenych Stefan Kühnom. Dale schadźuje so poradźowacy wuběrk za serbske naležnosće při BMI. Wuběrk schadźuje so znajmjeńša jónu wob lěto. Na nim wobdźěla so nimo zapósłancow Zwjazkoweho sejma tež zastupjerjo BMI a krajow Sakska a Braniborska. Serbow zastupuja předsyda Domowiny Dawid Statnik, městopředsyda Wylem Janhoefer, jednaćel Marko Kowar kaž tež předsydka załožboweje rady Susann Šenkec a direktor Załožby za serbski lud Jan Budar.