Tuchwilu smy wosrjedź wulkeho přewróta a wjele rěči so wo “strukturnej změnje”. Ale što to za Serbow woznamjenja? Kak chcemy w přichodźe žiwi być? A kotre ideje mamy? Dźěłarnička přichoda Łužicy dźěła tuchwilu na wodźacym wobrazu a chce do tutoho procesa mnoho towaršnostnych skupin zapřijeć.Hač do 18. oktobra maja wšitcy wobydlerjo Łužicy składnosć, so na online-diskusiji wobdźělić a swoje mysle a wočakowanja zapisać. W serbskej rěči je to móžno pod https://zw-lausitz.de/sr/; němska wersija prašenjow je wozjewjena pod https://beteiligung.zw-lausitz.de/lausitz/de/home/beteiligen. Tež, hdyž so jenož na dźěl prašenjow wotmołwi, je to jara wažne a spomóžne. Předsyda Domowiny Dawid Statnik wabi za to, zo bychu so mnozy słowa jimali, čłonki a čłonojo Domowiny a serbskich towarstwow, nawodźa a sobudźěłaćerjo serbskich institucijow runje tak kaž dalši Serbja: “Je wažne, zo so tež Serbja na procesu wobdźěla a w hornjo- a delnjoserbskej wersiji swoje měnjenja a wočakowanja zapodadźa. Tute so potom – zhromadnje z němskej wersiju – do wodźaceho wobraza Łužicy zjimaja.”