Předsyda Domowiny Dawid Statnik je dźensa wólbne kopolaki (Sakska) Sakskemu ministerskemu prezidentej Michael Kretschmerej přepodał. W tutych su tuchwilu palace temy Serbskeho ludu zjimane.

Na přeprošenje serbskeho zapósłanca Sakskeho krajneho sejma Marka Šimana bě ministerski prezident Sakskeje dźensa w Budyšinje, zo by so z byrgarjemi rozmołwjał. Do toho bě sej na krótki wopyt na Póstowe naměstno dojěł, zo by tam w rozmołwje z předsydu Domowiny Dawidom Statnikom, jednaćelku Domowiny Judit Šołćineje, referentku za naležnosće kubłanja Katrin Suchec-Dźisławkowej, zapósłancom Markom Šimanom, kaž tež wyšim měšćanostu Budyšina Karstenom Voigtom wo tuchwilnych temach serbskeho ludu kaž tež města Budyšina zhonił.

Předsyda Dawid Statnik zjima rozmołwu: “Wólbne kopolaki Domowiny njejsu jenož za nas myslene. Dźensa smy je načolnikej knježerstwa Swobodneho stata Sakskeje přepodali. Prašenja Domowiny na politiske strony a wotmołwy tutych su móžny zakład za dalše politiske jednanje na dobro serbskeho ludu.”

Pozadk:

W nalěću je třěšny zwjazk zjawnje namołwjał, zo zběra prašenja na politiske strony (wólbne kopolaki. Za Saksku wotmołwichu na tute SPD, CDU, Lěwica, Swobodni wolerjo, AfD, Zeleni a Zwjazk Sahra Wagenknecht.

Foće (Domowina/Božena Šimanec): referentka za naležnosće kubłanja Katrin Suchec-Dźisławkowa, zapósłanc Sakskeho krajneho sejma Marko Šiman, předsyda Domowiny Dawid Statnik, jednaćelka Domowiny Judit Šołćina, wyši měšćanosta města Budyšin Karsten Voigt (wotlěwa).