Dźensa bě skupina němsce wuknjacych šulerjow z Opole a wokoliny na wopyće pola Domowiny. Referent Domowiny Clemens Škoda předstaji třěšny zwjazk a połoženje Serbow. Organizowała je ekskursiju němska mjeńšina z Pólskeje. Hižo někotre lěta přewjedźe Socialno-kulturna towaršnosć Němcow w Opolskej Šleskej wubědźowanje za šulerjow kotrež ma zaměr, wědu wo němskej mjeńšinje w Pólskej šěrić. Hłowne myto je wulět do Němskeje. Lětsa wuzwolichu sej Budyšin a serbsku mjeńšinu. Kaž organizator a zastupowacy jednaćel towaršnosće Tomasz Gryga zdźěli, su chcyli šulerjam “fungowanje mjeńšinoweje skupiny a mjeńšinoweje organizacije w susodnym kraju na zakładźe Zwjazka Łužiskich Serbow pokazać”. Nimo Domowiny wopytachu hosćo z Pólskeje na namjet Škody Serbski gymnazij Budyšin a Serbski muzej.

Foće: Daniela Gurok