Dalše přihoty 19. hłowneje zhromadźizny běchu jedna z temow posedźenja Zwjazkoweho předsydstwa Domowiny pjatk wječor, 19. oktobra, w Choćebuzu. Pod nawodom předsydy Domowiny Dawida Statnika schwalichu wotběh a lisćinu čestnych hosći. Hłowna zhromadźizna wotměje so klětu dnja 30. měrca w Chrósćicach.Zwjazkowe předsydstwo přiwza towarstwo přećelow Serbow z Wendlanda (ně.: Wendischer Freundes- und Arbeitskreis e. V.) z Łuchowa (Lüchow/Wendland) nachwilnje jako asociěrowane towarstwo Domowiny. Doskónčny rozsud wo tym tworja delegaća hłowneje zhromadźizny.Dale schwali wone wólbny porjad za wuzwolenje serbskich zastupjerjow ze Sakskeje jako čłonow rady Załožby za serbski lud za dobu 2019-2023. Wólbnemu wuběrkej přisłušeja Křesćan Korjeńk, dr. Beata Brězanowa a Kathrin Młynkowa. Wólby su na přichodnym posedźenju zwjazkoweho předsydstwa 14. decembra předwidźane. Namjety za kandidatow přijimuje zarjad Domowiny hač do 1. nowembra. Bliše informacije k tomu su na web-stronje Domowiny wozjewjene.Marcus Kóncaŕ budźe zjednoćenstwa Serbow wot 2019 do 2023 w Rozhłosowej radźe RBB zastupować. Zwjazkowe předsydstwo slědowaše z tym namjetej župy Delnja Łužica. Zdobom dźakuje so dotalnej čłonce rady, Babett Zenkerowej, za dołholětne a spomóžne skutkowanje na dobro serbskeho ludu.Zwjazkowe předsydstwo podpěra ludowy namjet za zhromadnu šulu w Sakskej. We wobšěrnej diskusiji pokaza so mjez druhim na brach, zo njeje so namjet mjez wučerjemi, nošerjemi a staršimi serbskich šulow diskutowało. Gremij je so w tutym zwisku za to wuprajiło, šansy iniciatiwy za polěpšenje serbskich rěčnych rumow diskutować. Wo tym rozsudźić pak bychu dyrbjeli bjezposrědnje potrjecheni – horjeka mjenowani. Dale přijimowaše Zwjazkowe předsydstwo Domowiny rozprawu předsydy Braniborskeje serbskeje rady, Torstena Maka. Mak rozłožowaše mjez druhim změnjeny wólbny modus rady a temy nětčišeje wólbnje doby, kotruž dominujetej zwěsćenje přisłušnosće gmejnow k serbskemu sydlenskemu rumej a šulske kubłanje. Aktualny nadawk je namakać a wolić kandidatow za wólby serbskich zastupjerjow załožboweje rady, za čož je móžno kandidatow namjetować. Braniborskich zastupjerjow woli Serbska rada. Dalše informacije zdźěli rada. Zwjazkowe předsydstwo dźakowaše so předsydźe a čłonam za dobre dźěło. Tež wěnowaše so Zwjazkowe předsydstwo ewaluaciji WITAJ-wučby w Delnjej Łužicy. Namjetowaše diskusiju w zetkanju prezidija Domowiny a předsydstwa župy Delnja Łužica, přichodnu srjedu, pokročować.