Přihot přichodneho posedźenja Zwjazkoweho předsydstwa Domowiny steješe w srjedźišću posedźenja prezidija Domowiny dnja 18.04.2018 we Wojerecach. Pod nawodom předsydy Domowiny Dawida Statnika, zaběrachu so čłonojo gremija z kónčnym stawom europskeje byrgarskeje iniciatiwy Minority SafePack. W Němskej nahromadźichu so po wuprajenju FUEN 18.955 podpismow. Póndźelu, dnja 23.04.2018 přepodadźa so tute oficialnje němskim hamtam. Na přepodaću w Kölnje wobdźěli so nimo prezidenta FUEN Loránt Vincze tež wjednica mjeńšinoweho sekretariata Judith Šołćina. Zarjady maja za pruwowanje podpismow 3 měsacy čas. Po tym zdźěli so oficialna ličba připóznatych podpismow.“Wjeselu so jara, zo smy hranicu 1 mil. podpismow překročili. Běše to napjate lěto połne akcijow a zarjadowanjow. Njejsmy pak to sami zdokonjeli. Mnozy su nam jara pomhali a za akciju wabili. Tež su so wšitke relewantne politiske kruhi z iniciatiwu zaběrali abo so za nju wuprajili. Hač je to Braniborski krajny sejm abo ministerski prezident w Sakskej. Smy byli jara prezentni. Njeměli wuspěch jenož po ličbach měrić ale tež po politiskej diskusiji.”, tak Statnik. Dale zaběraše so prezidij w přihoće na přichodne posedźenje zwjazkoweho předsydstwa z přihotami 19. hłowneje zhromadźizny Domowiny a z rozprawu wo dźěławosći mjeńšinowej rady Němskeje. Tež wobjednachu stejišćo Domowiny ke krajnemu wuwićowemu planej Berlin/Braniborska.Přichodne posedźenje Zwjazkoweho předsydstwa Domowiny wotměwa so 27.04.2018 w Budyšinje. Přichodne regularne posedźenje prezidija Domowiny wotměwa so 30.05.2018 we Wojerecach.