Čłonojo župneho předsydstwa “Jan Arnošt Smoler” Budyšin zeńdźechu so srjedu popołdnju na swoje měsačne wuradźowanje. Mjez druhim dorozumichu so wo přihotach na Hłownu zhromadźiznu Domowiny. Hromadźe z kubłanskej referentku Domowiny wujasnichu, zo je rjadowanje wutworjenja serbskich rjadownjow w nowych dźěłowych směrnicach Domowiny zakótwjene. Kubłanske prašenja přewodźeja dźěło župneho předsydstwa a wosebje region župy prawidłownje.

Kito Hendrich, čłon župneho předsydstwa, informowaše, zo zeńdźe so 6. apryla iniciatiwna skupina wjesnjanow w domje Měrćina Nowaka w Njechornju. Zhromadnje z čłonami župneho předsydstwa chcedźa dźeń wotewrjenych duri přihotować. Tutón ma być 17. meje wječor wot 18 hodź.

W juniju swjeća w Malešecach jubilejej 800 lět prěnjeho naspomnjenja. Serbske poskitki  přihotuja čłonojo tamnišeje Domowinskeje skupiny, regionalna rěčnica jich při tym podpěruje. Na žurli “Wódneho muža” budźe 15. junija, na tak mjenowanym “Dnju wotewrjene wsy”, wustajeńca wo towarstwowym žiwjenju we wsy widźeć. Dale chcedźa z hosćimi jejka wóskować. W běhu swjedźensku tydźenja budu wjacore chóry z regiona na zhromadnym wječoru hromadźe spěwać a swjedźenski ćah chcedźa njedźelu 22. junija pokazać.