Chronika

27.5.1880	załožeńska zgromaźina Maśice Serbskeje, dolnoserbskego wótźělenja Maćice Serbskeje, w Chóśebuzu ako serbskego knigłowego towaristwa
28.10.1880	załoženje wuběrka, kótaryž ma pódpěrowaś serbskich studěrujucych, aby se brachoju na maminorěcnych fararjach a ceptarjach wótpomagało
1893-1906	pódpěrowanje wót studentow organizěrowanych spiwnych swěźenjow, kótarež se lětnje w Chóśebuskem wokrejsu wótměwaju
1904–1908	procowanje filologiskeje sekcije Maśice Serbskeje wó dalšne wuwiśe dolnoserbskeje rěcy
29.9.1905	swěźeń k 25-lětnemu jubileumoju Maśice Serbskeje w Chóśebuzu
13.10.1912	załoženje Domowiny we Wórjejcach; Maśica pśistupijo w oktobrje 1913 Zwězkoju serbskich towaristwow (na rozdźěl k Maćicy Serbskej)
1921	pśiwześe nowych statutow a zapisanje do towaristwowego registra
1928	Maśica dostanjo ako towaristwo prědny raz rumnosći, a to w filiali Serbskeje ludoweje banki w Chóśebuzu (na Žandojskej 45). Bankowy direktor dr. Jan Cyž pśewzejo katalogizaciju biblioteki.
10.8.1930	wóswěsśenje 50-lětnego wobstaśa Maśice Serbskeje we Wětošowje („Serbski ludowy a drastwiny swěźeń”)
30.8.1930	W peticiji na šulske zastojnstwo w Frankobroźe nad Wódru pomina Maśica mj. dr., nałožowaś serbsku rěc ako wuwucowańsku rěc wót prědnego lětnika.
1933/36	Maśica Serbska wjeźo wótněnta ako „wědomnostne towaristwo serbskich pśijaśelow knigłow“ swójo kulturne źěło dalej
měrc 1937	zakaz Domowiny a wšyknych jej pśisłušajucych towaristwow, teke Maśice; konfiscěrowanje jeje biblioteki
15.8.1945	pšosba Maśice na sowjetsku komandanturu w Chóśebuzu wó dowolnosć, aby směła swójo źěło dalej wjasć; na pismo se njewótgronijo
13.5.1993	nowozałoženje Maśice Serbskeje w Chóśebuzu ako dolnoserbske wótźělenje serbskego wědomnostnego towaristwa Maćica Serbska
1994 & 2001	Kolokwiji stawizniskeje sekcije Maćice gromaźe z Maśicu w Chóśebuzu na temu „Serbska Dolna Łužyca – problemy a perspektiwy“ (1994) a „Pšawa za Dolnych Serbow a jich zwopšawdnjenje w Bramborskej“ (2001)
2010	W ediciji „Serbske drogotki“ Serbskego muzeja w Chóśebuzu wujdu knigły „Maśica Serbska – 130 Jahre Bestrebungen zum Erhalt der niedersorbischen Sprache und Kultur“.
2010 & 2018	Wustajeńcy k historiji Maśice Serbskeje (w Chóśebuzu)