Rozprawa dźěławosće pomnikoweho wuběrka 2013/2014

Pomnikowy wuběrk Maćicy Serbskeje je gremij, w kotrymž so projekty nastupajo serbske pomniki předstaja, diskutuja a schwala. Doporučimy Załožbje za serbski lud, kotre projekty měła wona ze swojeho fondsa za serbske pomniki, kiž wučinja lětnje 8 000 eurow, spěchować. To nastupa wobnowjenje starych kaž tež postajenje nowych pomnikow. We wuběrku dźěłaja sobu zastupjerjo z Hornjeje a Delnjeje Łužicy. Ze stron załožby skutkuje sobu knjez John Petrik, předsydka je Trudla Malinkowa.

Wuběrk je so loni dwójce zešoł – jónu w nalěću hłownje k planowanju projektow, jónu w nazymje hłownje k bilancowanju dźěławosće tutoho lěta. Čłonojo wuběrka su wobstajne dźěło wukonjeli a so zhromadnje z nošerjemi jednotliwych projektow wo realizowanje pomnikowych předewzaćow prócowali. Za wukonjane dźěło chcu wšitkim sobustawam wuběrka na tutym městnje zjawny dźak wuprajić.

W lěće 2013 móžeštaj so dwaj projektaj zwoprawdźić:

1. Na próstwu TCM je so spěchowało wobnowjenje informaciskich taflow pomnika Cyrila a Metoda pola Smochćic, kotrež běchu so tehdy wot njeznatych wobškodźili. Mjeztym – tak před něšto tydźenjemi z medijow zhonichmy – su so informaciske tafle znowa wobškodźili a tež pomnik samón bu potrjecheny.

2. Zhotowił je so nowy kamjeń na row zasłužbneho fararja a Maćicarja Wylema Noweho na połnócnym pohrjebnišću w Choćebuzu. Jeho row běchu před něšto lětami zrunali. Nowy kamjeń budźe so lětsa postajić a tak zaso hódne wopomnišćo stworić. Zhotowjeny bu kamjeń na iniciatiwu kupki Serbske pomniki, nošer projekta bě město Choćebuz jako wobsedźer pohrjebnišća.

Zaběrali smy so na swojich posedźenjach tež z dalšimi objektami. Mjez nimi nam wosebje na wutrobje leži row Jana Arnošta Smolerja a jeho swójbnych na Hrodźišku w Budyšinje. Trěbne wobnowjenje Smolerjoweho rowa, kotryž je we wobsydstwje města Budyšina, budźe nas dale zaběrać.

Kónc apryla změjemy přichodne posedźenje pomnikoweho wuběrka, hdźež chcemy sej lětuše předewzaća dorěčeć. Štóž ma nastupajo serbske pomniki namjety, što móhło abo dyrbjało so něhdźe zwoprawdźić, njech so wobroći na předsydku abo sobustawy wuběrka.

Trudla Malinkowa
předsydka