Pomnikowy wuběrk Maćicy Serbskeje je gremij, w kotrymž so projekty nastupajo serbske pomniki předstaja, diskutuja a schwala. Doporučimy Załožbje za serbski lud, kotre projekty měła wona ze swojeho fondsa za serbske pomniki, kiž wučinja lětnje 8 000 eurow, spěchować. To nastupa wobnowjenje starych kaž tež postajenje nowych pomnikow. We wuběrku dźěłaja sobu zastupjerjo z Hornjeje a Delnjeje Łužicy. Ze stron załožby skutkuje sobu knjez John Petrik, předsydka je Trudla Malinkowa.

Wuběrk je so loni dwójce zešoł – jónu w nalěću hłownje k planowanju projektow, jónu w nazymje hłownje k bilancowanju dźěławosće tutoho lěta. Čłonojo wuběrka su wobstajne dźěło wukonjeli a so zhromadnje z nošerjemi jednotliwych projektow wo realizowanje pomnikowych předewzaćow prócowali. Za wukonjane dźěło chcu wšitkim sobustawam wuběrka na tutym městnje zjawny dźak wuprajić.

 W lěće 2014 su so sćěhowace projekty zwoprawdźili:

1. W nošerstwje Maćicy Serbskeje je so wobnowił row Arnošta Smolerja a jeho swójbnych na Hrodźišku w Budyšinje. Předewzaće bě wulke wužadanje, dokelž bě prawnisce kaž tež technisce wjele prašenjow rozrisać. Hłowne koordinaciske dźěło na tutym projekće je wukonjał knjez Měrćin Wirth, za čož słuša jemu dźak a připóznaće. Wobnowjenje je nimale zakónčene, jenož někotre mjeńše dźěła maja so lětsa nalěto hišće wuwjesć. Tuž budźe row serbskeho wótčinca składnostnje jeho klětušich 200. narodnin w dostojnym stawje.

2. Na próstwu Kamjenskeje župy Domowiny je so spěchowało inwentarizowanje katolskich nabožno-narodnych pomnikow we Wotrowskej wosadźe. Dźěło wukonjała je knjeni Trudla Kuringowa. Wuslědki maja so Serbskemu Institutej přepodać a so tam archiwizować. Z inwentarizowanjom ma so lětsa w Njebjelčanskej wosadźe pokročować.

3. Domowinska župa Dolna Łužyca je sej předewzała znowa wuhotować row Fryca Fobowa w Turjeju a jón přestworić na małe wopomnišćo. Spěchowało je so připrawjenje wotpowědneho pomjatneho kamjenja na rowje.

4. Domowinska skupina Łušć/Jaseńca chce lětsa připrawić pomjatnu taflu za Jakuba Nowaka-Horjanskeho w jeho ródnej wsy na Horje. Pomnikowy wuběrk MS je tu nimo financielneje wosebje tež skićił wobsahowu podpěru.

5. Zaběrali smy so na swojich posedźenjach tež z wobnowjenjom drjewjanych křižow na rowje swójby Měrćina Nowaka-Njechorńskeho w Hrodźišću. Wo jich ponowjenje je so postarała załožba sama, kotraž na zakładźe zrěčenja imobilije Domowiny wobhospodarja.

Srjedź měrca změjemy přichodne posedźenje pomnikoweho wuběrka, hdźež chcemy sej lětuše předewzaća dorěčeć. Štóž ma nastupajo serbske pomniki namjety, što móhło abo dyrbjało so něhdźe zwoprawdźić, njech so wobroći na předsydku abo sobustawy wuběrka.

Trudla Malinkowa,

předsydka