2020/2021

Rozprawa pomnikoweho wuběrka 2020/2021

Pomnikowy wuběrk Maćicy Serbskeje je gremij, w kotrymž so předewzaća nastupajo serbske pomniki předstaja, diskutuja a schwala. Doporučimy Załožbje za serbski lud, kotre projekty měła wona spěchować. To nastupa wobnowjenje starych kaž tež postajenje nowych pomnikow. We wuběrku dźěłaja sobu zastupjerjo z Hornjeje a Delnjeje Łužicy. Ze stron załožby skutkuje sobu John Petrik, předsydka je Trudla Malinkowa. Wuběrk je so loni dwójce zešoł a lětsa dotal jónu.

W lěće 2020 je pomnikowy wuběrk tři pomnikowe projekty přewodźał:

1. Spočatk lěta je Gołkojska wosada dała 150 lět staru pomjatnu taflu za zasłužbneho serbskeho fararja Karla Haußig wobnowić a ju z nješkitaneho městna pod hołym njebjom přenjesć do škitaneho ruma cyrkwje. Projekt je wušoł bjez spěchowanskich srědkow załožby, nastork k wobnowjenju pak je wušoł z kruha pomnikoweho wuběrka MS. Zjawne přepodaće wotmě so po dwurěčnych kemšach 23. februara 2020 w Gołkojcach. Swjedźensku narěč měješe dr. Hartmut Leipner.

2. Wjesne towarstwo „K žorawej“ w Koslowje je składnostnje lońšeje 75. róčnicy kónca Druheje swětoweje wójny postajić dało wuměłsce dźěłany pomnik z pomnjenowanjom „Nawrót do Koslowa“. Nošerstwo naróčneho předewzaća bě přewzało Njeswačanske towarstwo Přećelow kultury a domizny. Wotkryće pomnika bě za nalěto 2020 planowane, dyrbješe so pak koronakrizy dla přestorčić. Ze swjedźenskim zarjadowanjom móžachu potom pomnik 13. septembra 2020 zjawnosći přepodać. Njedawno su so tam wjesnjenjo znowa zešli a na jednolětne wobstaće swojeho wopomnišća spominali.

3. Składnostnje lońšich 200. narodnin Nosačanskeho fararja a serbskeho basnika, redaktora a publicista Michała Domaški je Serbske ewangelske towarstwo jeho swójbny row na Ketličanskim kěrchowje wobnowić dało. Rownišćo, w kotrymž štyrjo swójbni wotpočuja, je nimo toho jedne z mało rowow w Ketlicach, na kotrymž steja tež serbske słowa. Swjatočne přepodaće wobnowjeneho rownišća bě planowane za 18. nowember 2020 we wobłuku hłowneje zhromadźizny Serbskeho ewangelskeho towarstwa, dyrbješe pak pandemije dla wupadnyć. Nachwatać ma so zarjadowanje lětsa na reformaciskim dnju, 31. oktobra.

W lěće 2021 je so pomnikowy wuběrk z wjacorymi pomnikowymi projektami zaběrał. Dwě z nich je Załožba za serbski lud na poručenje wuběrka pjenježnje spěchowała:

1. Dale wjedło je so hižo wjacore lěta trajacy projekt inwentarizowanja katolskich nabožno-narodnych pomnikow přez knjeni Trudlu Kuringowu. Po tym zo bě wona w minjenych lětach wšitke wosady na teritoriju Kamjenskeje župy přeslědźiła, je lětsa w nošerstwje Budyskeje župy z projektom w Baćońskej wosadźe pokročowała. Předwidźane je dokumentowanje něhdźe 50 pomnikow w jednotliwych wosadnych wsach.

2. Pola Kamjeneje při dróze do Wulkeje Dubrawy wobnowja so nětko swjaty křiž, kotryž dopomina na zničenu wjes Hronow. Křiž bě burska swójba z Kamjeneje w lěće 1910 postajić dała. Hromadźe z dalšimi Hronowskimi pomnikami je Radworski chór Meja jón w lěće 2018 restawrować dał, štož je tehdy tež załožba spěchowała. Loni pak su njeznaći tutón swjaty křiž spowalili a z njeho křiž z korpusom pokradnyli. Při tym so swižny pěskowcowy stołp na wjacore dźěle rozbi. Zo w přichodźe hižo móžno njebudźe, swjaty křiž tak lochce spowalić, ma so wón nětko z krućišim fundamentom zakótwić.

Dalše pomnikowe projekty za klětu budźemy sej na přichodnym posedźenju našeho wuběrka 9. nowembra dorěčeć.

Zjimajo móžemy zwěsćić, zo pandemija drje tež dźěło we wobłuku serbskich pomnikow haći, zo pak pomnikowy wuběrk MS přiwšěm dale dźěła a wotpowědne projekty přewodźa.

Trudla Malinkowa, předsydka