Z festiwalnej fanfaru a witanjom krajneho rady wokrjesa Budyšin Michaela Hariga, Budyskeho měšćanosty dr. Roberta Böhmera a předsydy Domowiny Dawida Statnika zahaji so jutře, 22. junija, wječor w 19.30 hodź. na Budyskim hrodźe XII. mjezynarodny folklorny festiwal „Łužica“. Wšě wukrajne ansamble kaž tež Serbski folklorny ansambl Wudwor, Serbska rejowanska skupina Smjerdźaca a Serbski ludowy ansambl wuhotuja wotewrjensku galu. Zajimcy dóstanu hišće kartki při wječornej kasy. Hižo do toho poćahnu skupiny w swjedźenskim ćahu po měsće a so w swojich pyšnych drastach, z hudźbu a rejemi pokazaja a na štyridnjowski ewent wabja.

Pjatk su Hochozy/Drachhausen hosćićelka festiwala. We 18 hodź. zahaja so wječorne programy z hudźbu a postrownymi słowami čestnych hosći. Mjez druhim wočakuja tam zamołwiteho knježerstwa za narodne mjeńšiny Hartmuta Koschyka (MdB). Cyłkownje změja w Hochozy štyri jewišća.

 “Wjeselimy so na wopyt patrona našeho festiwala, sakskeho ministerskeho prezidenta Stanisława Tillicha, njedźelu popołdnju w Chrósćicach”, praji dźensa w Budyšinje předsyda přihotowanskeho wuběrka a jednaćel Domowiny Marko Kowar, a doda: “Smy derje přihotowani a nadźijam so, zo so nam wšo poradźi.” Domowina zhromadnje z partnerami mjezynarodny folklorny festiwal z lěta 1995 kóždej dwě lěće organizuje. Partnerjo su Serbski folklorny ansambl Wudwor, Serbska rejowanska skupina Smjerdźaca, gmejnje Chrósćicy a gmejna Hochozy (z lěta 2007) kaž tež Załožba za serbski lud.

Paralelnje k festiwalej wotměje so w Budyšinje a Chrósćicach XX. FUEN-seminar słowjanskich narodnych mjeńšich. Na nim wobdźělitaj so tež prezident Federalistiskeje Unije Europskich Narodnosćow (FUEN) Loránt Vincze a wiceprezident FUEN Bjarnat Cyž, kiž je zdobom čłon Zwjazkoweho předsydstwa Domowiny. Jedna tema budźe angažement za zběranje 1 miliony podpismow za iniciatiwu mjeńšinow Minority Safepack za wjace prawow narodnym mjeńšinam w krajach Europy.