Download Programa Domowiny jako PDF

Program DOMOWINY

zagronitosć – wótwórjonosć – zwězanosć

3. nacerjenje, 27.9.2024

Preambla

W lěśe 1912 jo se załožyła Domowina ako kšywowy zwězk serbskich towaristwow. To jo było nabejne tšojenje w serbskich stawiznach. Z tym jo se wóla k zjadnośenju mócow w serbskem narodnem gibanju jasnje zwurazniła a prědny raz do statka stajiła. Pó měrnej rewoluciji w lěśe 1989 jo se Domowina k politiski njewótwisnemu a nadstrońskemu kšywowemu zwězkoju Serbow[1] a serbskich towaristwow pśetwóriła. Źinsa jo Domowina kazniski pśipóznata zastupjaŕka zajmow serbskego luda. Słužymy  swójomu cłonkojstwoju ako tek cełemu serbskemu ludoju.

Domowina wuznawa se k Zakładnej kazni. W zgromadnosći europejskich narodow smy rownogódne a zasajźujomy se za lichotu a měr. Wótpokazujomy kuždycku formu ekstremizma.

Program Domowiny jo zakład statkowanja kšywowego zwězka. Źěłowe směrnice Domowiny konkretizěruju powšykne zaměry programa. Kuždy, kotaremuž na Serbstwje a pśedewšym na našej rěcy zalažy, daś se w kšywowem zwězku angažěrujo.

Zagronitosć Domowiny za serbski lud statkowaś wuchada ze stawiznow. Wótwórjonosć wóznamjenjujo, až smějo se kuždy z nami za serbski lud zasajźowaś. Zwězanosć zwuraznjujo se w zgromadnem procowanju wó wobstaśe našog luda.

Zagronitosć – wótwórjonosć – zwězanosć su zakładne gronidła jadnanja Domowiny.

Zakładne gronidła jadnanja Domowiny

Zagronitosć

Šćit, spěchowanje a wuwijanje serbskeje rěcy, sedleńskego ruma, kultury a identity Serbow ako teke procowanja wó rozšyrjenje pšawa sobu- a samopóstajenja w serbskich nastupnosćach su głowne zaměry našogo zgromadnego statkowanja.

Ako kazniski pśipóznate zastupnistwo zajmow Serbow jadnamy zagroniśe a za wšyknych Serbow. Comy-lic serbstwoju pśichod daś, dejał se kuždy jadnotliwc pó swójich móžnosćach za to zasajźowaś.

Wótwórjonosć

Domowina jo wšyknym Serbam a pśijaśelam Serbow wótwórjona – lěc bydle we Łužycy abo zwenka njeje, lěc jadnotliwc, kupka abo towaristwo. Pódpěrujomy kradu wšakorake móžnósći za wobźělenje na serbskem towarišnostnem a kulturnem žywjenju. Smy demokratiski organizěrowane zastupnistwo serbskich zajmow a jadnamy transparentnje. Naše cłonki su zakład statkowneje seśi serbskeje ciwilneje towarišnosći. Kuždy jo pśepšosony sobu statkowaś.

Zwězanosć

Serbske stawizny, kultura, rěc a z togo wuchadajuca narodna identita, ako tek zgromadne narodne procowanje - wšo to nas zwězujo. Rownogódnosć dolno- a górnoserbšćiny zjadnośujo naš lud. Statkujomy w zmysle toś teje zwězanosći, kótaraž wšykne regiony Łužyce wopśimjejo. Rownocasnje zwězuju aktiwity Domowiny kradu wšakorakich partnarjow we Łužycy a zwenka njeje.

Ako zastupjaŕka serbskich zajmow póbitujo Domowina wšyknym Serbowkam a Serbam ako teke pśijaśelam Serbow pomoc pśi narodnem źěle.

Serbski lud skšuśiś, rěc a kulturu wobchowaś

I. Zwězk Łužyskich Serbow

Cłonkojstwo Domowiny jo zakład demokratiskego statkowanja w kšywowem zwězku. Źěło cłonkojskich župow, kupkow a towaristwow pódpěrowaś jo nam bytostny nadawk. Wóni su nosarje towarišnostnego žywjenja w Serbach. Aktiwne sobuźěło jadnotliwcow, towaristwow, župow a organow Domowiny pśi zwopšawdnjenju wobzamknjenjow głownych zgromaźiznow Domowiny jo zakład za wuspěšne statkowanje kšywowego zwězka.
Zgromadnje wabimy za statkowanje w Domowinje. Kuždy, lěc jadnotliwc abo towaristwo, jo nam ako cłonk kšywowego zwězka witany. Zakład za zgromadne źěło twórje wustawki a program Domowiny.

II. Politiske zastupnistwo

Domowina zastupujo zajmy serbskego luda, což jo se teke do serbskeju kaznjowu zapisało. Wóna stara se wó rozšyrjenje sobu- a samopóstajeńskich pšawow a winowatosćow pśedewšym w serbskich politiskich, kulturnych a kubłańskich nastupnosćach. Jadnamy ze wšyknymi demokratiskimi akterami na komunalnej, krajnej, zwězkowej ako tek europejskej rowninje. Wuźaržujomy mjazynarodne kontakty k narodnym mjeńšynam a drugim ludam. Pśi tom jo wažny nadawk Domowiny wědu wó Serbach we Łužycy a zwenka njeje dalej rozšyrjowaś.

III. Šćit a wózroźenje serbskeje rěcy

Serbšćina jo nam nejdrogótnjejše derbstwo našych prědownikow. Jeje woplěwanje, šćit a wózroźenje jo nam nejwažnjejšy nadawk. Pózbuźujomy familije k woplěwanju serbskeje rěcy. Zasajźujomy se za zwopšawźenje efektiwnych, rěc spěchujucych napšawow wósebnje w źiśownjach a šulach. Pśewjeźomy a pódpěrujomy napšawy k wóžywjenju serbskeje rěcy wšuźi tam, źož wóna w tej chyli kšuty wobstatk zjawnego žywjenja njejo. Napóranje nowych rěcnych rumow jo wažny wobstatk našych procowanjow.

IV. Kultura a sport, wuměłstwo a wědomnosć

Kulturne źěło, sportowe gibanje, wuměłstwo a wědomnosć su wažne słupy serbskego  žywjenja a źěłabnosći kšywowego zwězka. Rownocasnje su aktery na toś tych pólach pósoły našogo luda we Łužycy a zwenka njeje. Pódpěrujomy wuměnu wósebnje ze słowjańskim wukrajom a drugimi narodnymi mjeńšynami. Spěchujomy zgromadne źěło serbskich institucijow z cesnoamtskimi akterami. Zgromadne projekty institucijow wobogaśuju kulturne žywjenje w Serbach.

V. Nabóžno-narodne žywjenje

Bogate derbstwo nabóžno-narodnych tradicijow a nałogow jo wobstatk žywjenja Serbow, tek za pśichodne generacije. Jich aktiwne woplěwanje jo wažny zakład za wutwórjenje a skšuśenje tek narodnego wědobnja. Wósady su njewuzbytne serbske rěcne rumy a socialneje seśi.

VI. Łužyca ako góspodaŕski rum

Góspodaŕstwo jo rěp Łužyce a wobwliwujo njepósrědnje socialne połoženje našeje domownje a serbskego luda. Ze spěchowanim serbskeje rěcy a kultury pówušujomy atraktiwitu regiona. Wósebnje dwójo- a wěcejrěcnosć jo za łužyske pśedewześa  wudobytk. Pódpěrujomy wšykne napšawy, kenž  pógnuwaju regionalne góspodaŕstwo k wužywanju serbskeje rěcy. Zasajźujomy se za kooperaciju Łužyce z pśigranicnymi stronami Pólskeje a Čěskeje. Pódpěrujomy łagodny turizm, kótaryž zmóžnijo gósćam serbsku kulturu we Łužycy zeznawaś.

VII. Łužyca – naša domownja

Łužyca jo srjejźišćo a domownja Serbow. Zasajźamy se za to, aby se serbskosć w sedleńskem rumje dalej zmócniła a wuwijała. Źiwamy na zaměrne zapśimowanje serbskeje rěcy a kultury do regionalnego, komunalnego a krajnego planowanja. Stolěśe trajuce wudobywanje brunice jo zawostajiło serbskemu ludoju teke wjelike škódy. Proces strukturneje změny póbitujo nam nowe perspektiwy za wózroźenje a spěchowanje serbskeje rěcy.

“Trać dyrbi Serbstwo, zawostać!”

Handrij Zejler, 1842

[1] Kuždežkuli pomjenjowanje wósobow w toś tom teksće se póśěgujo rownogódnje na wšykne rody.