Domowina je tutón tydźeń wudała nowe čisło swojeho informaciskeho łopjena “Naša Domowina”. Wone je wušło z nakładom 7000 eksemplarow a so čłonam po direktnym puću rozdźěla. Pozadk toho je, zo steji nimo wobšěrneho zhladowanja na lětuši mjezynarodny folklorny festiwal „Łužica“ a dalšich rozprawow wabjenje za mjeńšinowu iniciatiwu Minority SafePack w srjedźišću, a to z dalšimi informacijemi a podpismowej lisćinu.Zaměr iniciatiwy Minority SafePack je, Europsku komisiju zawjazać, so aktiwnje do dialoga z narodnymi mjeńšinami Europy podać a jich naležnosćam kaž tež regionalnym abo mjeńšinowym rěčam wjetšu kedźbnosć dać. Za to zběra Federalistiska unija europskich narodnosćow (FUEN), w kotrejž je tež Domowina z čłonom, hač do klětu 2. apryla podpisma. „Trjebamy 1 milion podpismow ze 7 krajow Europy, zo bychmy tutón zaměr docpěli. Tohodla prošu wšěch našich čłonow w župach a towarstwach, w Domowinskich skupinach, w młodźinskich klubach, w chórach a we wšěch cyłkach našeje organizacije, tute předewzaće ze swojim podpismom a ze zběranjom dalšich podpismow podpěrać“, praji dźensa w Budyšinje předsyda Domowiny Dawid Statnik. Wón chce so w přichodnych tydźenjach z předsydstwami župow a towarstwow zetkać a steji jim a wšěm dalšim zajimcam za dalše prašenja k informaciji (tel. 03591 550-102, -112; e-mail: domowina-bautzen@sorben.com). Móžnosć digitalneho podpisanja a dalše informacije namakaja zajimcy dale na web-stronje Domowiny. W mediatece je “Naša Domowina” tohorunja wozjewjena a na naprašowanje připósćele zarjad (felber-pr-domowina@sorben.com) digitalne wudaće tež z po direktnym puću z e-mailku.