Srjedu dopołdnja so w Slepom wuradźowanje regionalnych rěčnicow a referentow Domowiny wotmě. Diana Maticowa, regionalna rěčnica na teritoriju župy „Jakub Lorenc-Zalěski” informowaše wo wužadanjach Serbow Slepjanskich kónčin w času změny struktury. Potom wěnowachu so wobdźělnicy mjez druhim aktualnemu wubědźowanju idejow Braniborskeje pod hesłom „Kulturna domownja Łužyca”, na kotrymž so zaso Serbja wobdźělić chcedźa.
Předstajiła je so nowa sobudźěłaćerka za projekty w srjedźnej Łužicy, Marka Suchec. Jednaćel Marko Kowar: „Ze zakónčenjom wudobywanja brunicy za něšto lět so lětdźesatki trajace rozestajenja wo přesydlenja skónča. Wšitcy mamy Serbam tutoho regiona poboku być, zo by so serbska rěč dale a bóle rewitalizowała a kultura so pod měnjacymi wuměnjenjemi spomožnje wuwiwała. "