Předsyda Domowiny, Dawid Statnik, na zjawne słyšenje w Europskim parlamenće skedźbnja: Předmjet zarjadowanja je iniciatiwa Minority SafePack. Termin drje hakle 23. měrca w 15 hodź. budźe, ale nošer iniciatiwy FUEN prosy wšěch, kotřiž su zajimowani, na słyšenju přitomni być, so hač do kónca februara wobroćic na info@fuen.org abo 030 / 364 284 050.Dawid Statnik so k tomu wupraja: „My Serbja smy ze zběranjom podpismow k prěnjemu wulkemu wuspěchej tuteje iniciatiwy přinošowali: zo dyrbi so europska politika na zakładźe našich žadanjow lěpšej podpěrje etniskim mjeńšinam wěnować. Prěnja dalša kročel bě prezentacija prawnisce precizowanych namjetow Europskej komisiji 5. februara. Zjawne słyšenje w europskim parlamenće budźe druha kročel. Nětko dźe wo to, dosć zjawneho podźělbraća na tutym procesu organizować, zo by europska komisija zwólniwa była, parlamentej wotpowědne namjety za zakonjedawarstwo předpołožić. To ma so hač do 10. julija stać a budźe třeća kročel. Wažny dypk za nas Serbow je přijimowanje spěchowanja rěčnych a narodnych mjeńšin do tak mjenowaneje europskeje politiki kohezije, potajkim wurunaneho wuwića wšěch regionow. Z wotpowědnych euopskich pjenježnych horncow maja so potom tež strategije a inwesticije etniskich mjeńšin w jich regionach direktnje podpěrować. To so jara hodźi do našeje pozicije w procesu změny struktury we Łužicy: serbsku rěč a kulturu bóle do kóždeho nadawka při wuwiću regiona zaprijec, zo bychmy jónkrótnu identitu regiona wobchowali. A nic naposledk smy solidariscy z narodnymi mjeńšinami druhich europskich krajow, kotrymž so hubjeńšo hač nam wjedźe. Jim mamy z tutej iniciatiwu poboku być, zo bychu woni we wojowanju přećiwo diskriminaciji skrućene byli.”