Ze zwukami festiwalneje fanfary wuklinča dnja 25. junija w Chrósćicach XII. mjezynarodny folklorny festiwal “Łužica”. Štyri dny dołho bě 43 ansamblow z něhdźe 860 sobuskutkowacymi wopytowarjow w Budyšinje, Hochozy a Chrosćicach zahoriło. Mjez sobuskutkowacymi bě 7 skupin dźěći a młodostnych z 170 čłonami.
Wulki zajimNimo 29 ansamblow z Łužicy kaž tež Durinskeho folklorneho rejowanskeho ansambla Rudolstadt z. t. a De Öwerpetters z Wendlanda wobdźěli so 12 wukrajnych skupin: Art Appreciation folk dance group z Egyptowskeje, Krupitskaya Muzyki z Běłoruskeje,  Grupo Folclórico Uninorte z Kolumbiskeje, Music & Dance Group Naoussa Paros z Grjekskeje, I Trillanti ! z Italskeje, Tanečnί soubor Holubička z Chorwatskeje, Szarkaláb Hungarian Folk-Dance Group z Rumunskeje, rejowanska skupina Furmicska Néptánc Egyesület z Madźarskeje, American Rhythm Folk Ensemble z USA, Myllargutens Gammaldansorkester z Norwegskeje, Zespół Góralski Zornica z Pólskeje a Lubomir Tatarka ze Słowakskeje republiki.„Wjeselu so, zo móžachmy prěni raz wšě přeprošene skupiny witać a wězo nad wulkim zajimom našich wopytowarjow. Na wšěch štyri dnjach festiwala w Budyšinje, Hochozy a Chrósćicach mějach cyłkownje wjace hač 20.000 wopytowarjow. To pokaza wulki zajim za naš festiwal”, praješe na kromje festiwala předsyda přihotowanskeho wuběrka a jednaćel Domowiny Marko Kowar. Domowina z lěta 1995 kóždej dwě lěće zhromadnje ze Serbskeje rejowanskej skupinu Smjerdźaca, Serbskim folklornym ansamblom Wudwor, gmejnomaj Chrósćicy a Hochozy (z lěta 2007) kaž tež ze Załožbu za serbski lud tutón festiwal organizuje.Dźak wšěm organizatoram a podpěraćelamPatron XII. mjezynarodneho folklorneho festiwala “Łužica”, sakski ministerski prezident Stanisław Tillich, wobdźěli so njedźelu popołdnju w Chrósćicach na festiwalnym finalu. Wón dźakowaše so organizatoram pod nawodom Marka Kowarja za tutón pisany, mnohostronski a swětej wotewrjeny swjedźeń, kiž je sej krute městno w protyce festiwalow Europy zdobył, a wšěm podpěraćelam, wosebje Chróšćanam. Dale wobdźělichu so mjez druhim zapósłanća Zwjazkoweho sejma a čłonka Zwjazkoweho předsydstwa Domowiny Marja Michałkowa a wjacori zapósłancy Sakskeho krajneho sejma.Předsyda Domowiny Dawid Statnik dźakuje so wutrobnje wšěm, kiž maja podźěl na poradźenju tutoho wulkeho swjedźenja: “Je mi z wutrobitej naležnosću, so wšěm dźakować, kiž su k poradźenju tutoho wulkotneho kulturneho zetkanja přinošowali. Dźakuju so wutrobnje wšěm sobuskutkowacym, wšěm ansamblam a skupinam, wšěm pomocnikam, sponsoram a spěchowarjam. Wosebje dźakuju so mějićelam statokow w Hochozy a Chrósćicach, kiž so wšo za to činili, zo móžeše tuta jónkrótna festiwalna atmosfera nastać a zo bychu so hosćo witani čuli.”Podpisma za Europsku wobydlersku iniciatiwu Minority SafePackKaž hižo 2015 bě tež lětsa zaso hajenje imaterielneho kulturneho namrěwstwa narodnych mjeńšin wosebity programowy dypk, kiž prezentowachu ansamble z Pólskeje, ze Słowakskeje, Norwegskeje, Rumunskeje a Italskeje kaž tež Łužiscy Serbja. Wuměnje nazhonjenjow wo tutych prašenjach słužeše tež seminar słowjanskich narodnych mjeńšin, kiž su w Federalistiskej uniji europskich narodnosćow (FUEN) organizowani, za čas festiwala. Mjez wobdźělnikami bě prezident FUEN Loránt Vincze, kiž runje tak kaž předsyda Domowiny Dawid Statnik za iniciatiwu Minority SafePack wabješe, kotraž bě so před krótkim zahajiła. Zaměr tuteje europskeje wobydlerskeje iniciatiwy je, w běhu jednoho lěta 1 milion podpismow nazběrać, zo by so Europska unija zawjazała, so aktiwnje do dialoga wo lěpšim wobdźělenju europskich mjeńšin a regionalnych abo mjeńšinowych rěčow podać. Dalše informacije pod www.fuen.org a http://www.minority-safepack.eu/