„Daloko na zapadźe – zasydlenje Połobskich Słowjanow z archeologiskeho wida“

dr. habil. Jens Schneeweiß

póndźelu, 9. meje 2022, w 17.00 hodź.
w Zejlerjowej bróžni, Drježdźanska 18, 02977 Wojerecy

program:

17.00 hodź.         witanje – Dawid Statnik, předsyda Domowiny;

                              dr. Anja Pohončowa, předsydka Maćicy Serbskeje

17.10 hodź.        předstajenje Wendlandskeho přećelskeho a dźěłoweho kruha – Ernst Stelte, předsyda

17.25 hodź.         přednošk (w němskej rěči) – dr. habil. Jens Schneeweiß

Po tym chcemy wječor z přikuskom na zahrodźe wuklinčeć dać.

Wendland leži cyle na zapadźe słowjanskeho swěta, na wonym boku Łobja w Nižosakskej. Mjenuje so tak swojich połobskich stawiznow dla. Tu sydleše kmjen Połobskich Słowjanow z mjenom „Drjewjany”. Tola spočatki zasydlenja tutych Połobjanow w mjenowanej kónčinje njejsu znate, dokelž pisanske žórła k tomu mjelča. Přednošk wěnuje so z archeologiskeho wida tutomu prašenju a předstaji najnowše dopóznaća slědźerjow.

Wendlandski přećelski a dźěłowy kruh Łuchow http://www.wendland-episode1.de/  je asociěrowany čłon Domowiny. Zhromadnje tworitej wobě organizaciji móst mjez słowjanskej zašłosću w Delnjej Sakskej, kotraž je slědy hač do přitomnosće zawostajiła, a słowjanskej přitomnosću we Łužicy, kotraž puće do přichoda twari. Serbja w Sakskej a Braniborskej su jenički awtochtony zapadosłowjanski lud na teritoriju dźensnišeje Němskeje, kotrehož eksistenca je połdra lěttysaca přetrała. Tohodla podpěruje Domowina angažement za hajenje kulturneho a rěčneho herbstwa we Wendlandźe a wjeseli so, we Wojerecach najnowše wuslědki slědźenja z Wendlanda pokazać směć. To je zhromadne zarjadowanje Domowiny – Zwjazka Łužiskich Serbow z.t., Domowinskeje župy „Handrij Zejler“ Wojerecy, wědomostneje towaršnosće Maćica Serbska z.t. a Wendlanskeho přećelskeho a dźěłoweho kruha z.t., kiž budźe z małej delegaciju přitomny.