Financowanje puća na serbskich slědach Wojerec „Via Sorabica Hoywoj” ma bórze z temu zetkanja zastupjerjow župy „Handrij Zejler” ze zamołwitymi města być. To je župne předsydstwo na swojim posedźenju wutoru nawječor rozsudźił, po tym zo je Werner Sroka dalše wuslědki swojich rešeršow wo serbskim nakładniku und tehdomnišim předsydźe Wojerowskeho burskeho towarstwa, Awgusće Lapštichu, předstajił. Dale je gremij towarstwo „Šulska a domizniska stwa Ptačecy” do župy přiwzał. Čłonojo towarstwa su wotpowědnu próstwu jednohłósnje zapodali.

Rěčna swětłownja, dźěłarnička za šiće, zhromadne popołdnjo za swójby z Bratrowstwom w Kulowje a dwě zarjadowani w měšćanskej bibliotece - čitanje za němske dźěći wo serbskej literaturje a přednošk wo serbskich stawiznach składnostnje 110. narodnin Domowiny – steja na dalšim lětušim planje župy. Zdobom je regionalna rěčnica Sonja Hrjehorjowa hotowarniče regiona na zhomadne dźěło za přiručku wo serbskej drasće zwołała. 15.10. so koncert, přednošk a wopomnjeće składnostnje 150. posmjertnin Handrija Zejlerja jako zhromadne zarjadowanje župy a Serbskeho ludoweho ansambla we Łazu wotměje.

Tež z akterami planowaneho „AG serbske žiwjenje” Kulturneje fabriki (Kufa) planuja rozmołwu wo wšelakich perspektiwach na Serbstwo we Wojerowskim regionje a móžnej kooperaciji. Po wólbach noweho krajneho rady we wokrjesu Budyšin su so tež z politiku wokrjesa napřećo Serbacm zaběrali: Župa sej wutworjenje wuběrka za serbske naležnosće přeje, zo bychu zajimy Serbow a wosebje tež wuznam serbskeje rěče wjetšu wahu dóstali.