Póndźelu, 17.1., nawječor je předsyda Domowiny, Dawid Statnik, z nawodami župow a nadregionalnych towarstwow wo dalšim wobchadźenju z wustawkami třěšneho zwjazka wuradźował. Loni bě hłowna zhromadźizna w Slepom z wulkej wjetšinu změny wustawkow wobzamknyła. Naćisk bu do toho wot prawniskeho wuběrka, dawkoweho poradźowarja a prawiznika pruwowany. Hamtske sudnistwo w Drjezdźanach je drje mjeztym wólby připóznało, měješe pak k jednomu dypkej změnjenych wustawkow wobmyslenja.

Tak njeje po jich měnjenju artikl 8, wotrězk 1 dosć konkretnje sformulowane, po kotrymž smě zwjazkowe předsydstwo dalšich zastupnikow w zmysle § 26 BGB powołać, „kotrymž so pak prawo, Domowinu samostatnje juristisce zastupować, njepřenjese”. Tak chcyše Domowina  „princip štyrjoch wočow” zaručeć. To ma so jasnišo wopisać.

Dokelž su so wšitke změny wustawkow w cyłku wobzamknyli, hodźa so tež jenož wšitke změny přiwzać abo wšitke wotpokazać. Mjenowaneho dypka dla so přiwzaće wšitkich dalšich změnow, kotrež njejsu so kritizowali, njezmóžni. Tohodla płaća dale wustawki z lěta 2013. To pak by woznamjenjało, zo mjez druhim zakótwjene prawa jednotliwcow a čłonow zwonka Łužicy, kajkež su so w naćisku lěta 2021 wobzamknyli, njepłaća. Zdobom hrozy strach, zo digitalne posedźenja gremijow hižo po kóncu awgusta móžne njebudu, njepodlěša-li so postajenja zwjazkoweje politiki za čas pandemije.

Wšitcy, kotřiž su so słowa jimali, su so za krótkodobne zwołanje wurjadneje hłowneje zhromadźizny w hybridnej formje (na městnje a digitalnje) z mjeńšim klučom delegatow a jeničkej temu, wobzamknjenje wustawkow, wuprajili. Wospjetnu debatu wo wustawkach na regularnej hłownej zhromadźiznje 2023 njeje nichtó preferował, wšako je so hižo do lońšeje hłowneje zhromadźizny dołho diskutowało a na kóncu z přemóžacej wjetšinu rozsudźiło.

Prezidij je předsydźe nadawk dał, do posedźenja Zwjazkoweho předsydstwa 28. januara předsydow towarstwow zwołać, zo bychu poziciju zastupjerjow bazy narodneje organizacije zwěsćili. Wurjadna hłowna zhromadźizna ma so w běhu třoch měsacow wotměć, hdyž ju zwjazkowe předsydstwo abo předsyda na požadanje znajmjeńša třećiny, potajkim šěsć sobustawskich towarstwow, zwoła.

Předsyda Domowiny, Dawid Statnik: „Widźu po dotalnych wuprajenjach na dźensnišim wuradźowanju a do toho hižo w prezidiju wulki konsens, na najkrótšim pruću prawnisku wěstotu a płaćiwe modernizowane wustawki dóstać. Po našim bazodemokratiskim principje běše nam wažne, zo móža zastupjerki a zastupjerjo bazy Domowiny jasnje swoju wolu zwuraznjeć. Prawniske wušparanja w jednym jeničkim dypku njesmědźa so na škodu modernizacije wustawkow a našeje wšědneje dźěławosće wuskutkować. Wo dalšim postupowanju rozsudźa doskónčnje towarstwa a zwjazkowe předsydstwo.”

Pokiw: Podłožki ze wšěmi detailemi w tutej naležnosći budu do zwjazkoweho předsydstwa runja wšěm dalšim předłoham zjawneho posedźenja na internetnej stronje Domowiny zjawnosći spřistupne.