Prezidij Domowiny je na swojim wuradźowanju srjedu wječor njedawne posedźenje poradźowaceho wuběrka za prašenja serbskeho ludu poboku Zwjazkowemu ministerstwu nutřkowneho wuhódnoćił. Tema běše mjez druhim zakoń wo online-přistupje, kiž rjaduje digitalnu komunikaciju mjez wobydlerjemi a zarjadami – zastupjerjo Serbow su na to skedźbnili, zo maja hamtske formulary tež w mjeńšinowych rěčach přistupne być. Domowina budźe nětko aktualnu rozprawu předsydy wo połoženju serbskeho ludu na swojej internetnej stronje wozjewjeć. Maksimilian Hasacki je swoju skicu projekta “zorja” rewitalizacije delnjoserbšćiny z programom imersije dorosćenych předstajił. Tam dźe na zakładźe mjezynarodnych nazhonjenjow wosebje indigenych ludow mjez druhim z Kanady wo přiswojenje rěče ze stron młodych dorosćenych, kotřiž su zwólniwi, rěč wšědny dźeń w swójbje nałožować a swojim dźěćom dale dać. Projekt chcedźa do spěchowanja w zwisku ze změnu struktury Łužicy zapodać. Na namjet předsydy Domowiny, Dawida Statnika, poruča prezidij přestorčenje hłowneje zhromadźizny wot kónca měrca do lěća. Móžny termin je po měnjenju prezidija sobotu, 24. julija, dźeń stoćin załoženja župow a spočatk “Lěta župow” třěšneho zwjazka. Tak bychu móhli hłownu zhromadźiznu ze serbskim swjedźenjom zwjazać, wo kotrymž jako regionalnu alternatiwu za wotprajeny mjezynarodny folklorny festiwal přemysluja. Dotalne wotmołwy ze župow a towarstwow signalizuja wotpokazanje nuzowoweje warianty z jenož 50 wobdźělnikami pod wuměnjenjemi pandemije nalěto a z tym dotal planowaneho termina 27.3. Předsyda Domowiny rozprawješe wo oficielnym přepodaću próstwy wokrjesa Dubja-Błota wo přiwzaće jako spěchowacy čłon třěšneho zwjazka Serbow srjedu w Lubinje. Prezidij poruča zwjazkowemu předsydstwu za posedźenje pjatk přihłosowanje próstwje. Detaile kooperacije měli so we wosebitym dojednanju rjadować.