Přihotowanja na přichodnu Europeadu, europske mišterstwa awtochtonych narodnych mjeńšin w kopańcy, su nětko we Łužicy horcu fazu docpěli. Turněr so wot 20. do 28. smažnika w Korutanskej wotmě. Wutoru je so rozšěrjenski přihotowanski wuběrk „Serbske mustwo – Europeada 2020” w Dešnje na třeće posedźenje zešoł. Wo wuslědkach informowaše Clemens Škoda, referent Domowiny za wukraj a kulturu, kiž je jako nawoda delegacije za organizowanje projekta přisłušny:„Najprjedy su zastupjerjo dźělow mustwa z delnjeje a Hornjeje Łužicy wo swojich dotalnych přihotach rozprawili, na přikład wo wulosowanju w Korutanskej, treningowym lěhwje a přihotowanskim turněrje mustwa žonow, wo treningowym lěhwje muži a wobdźělenju zhromadneho mustwa na brunicowym cupje w Choćebuzu. Nimo toho su so z konkretnym přihotom na tydźeń Europeady a zestajenjom delegacije zaběrali. Dotal hišće konkretny hrajny plan ze stron zarjadowarja FUEN znaty njeje, štož planowanje tuchwilu poćežuje.Přichodna kročel je šěrjenje informacijow towarstwam hrajerjow, jeli trjeba dźěłodawarjam a wězo hrajerjam samym. Hladajo na mustwo muži su woni wobzamkli, zo so hač do kónca małeho róžka rozšěrjeny kader nominuje, kiž z 28 hrajerjow wobsteji. Z nich chcedźa w róžowniku 22 hrajerjow za kader na Europeadźe wuzwolić, kotřiž su woprawnjeni sobu hrać.Móžemy Wam foto wuradźowanja k dispoziciji stajić. Maće-li prašenja, wobroćće so přosu na Clemensa Škodu, tel.: 03591 / 55 02 08; mobil: 0173 / 351 54 40, clemens.skoda@domowina.deInternetne strony wo Europeadźe 2020: https://www.europeada.eu/home/de;https://de.wikipedia.org/wiki/Europeada