Brošurku „Moje wukubłanje” su Marija-Tereza Krawžic, Marija Koklina, socialna dźěłaćerka za młodźinske socialne dźěło Rěčneho centruma WITAJ, a Pětr Brězan, referent za hospodarske a infrastrukturelne naležnosće Domowiny, dźensa Worklečan šuli přepodali. Marija-Tereza Krawžic běše w swojim poslednim lěće jako kubłanska referentka Domowiny brošurku wudźěłała, Marija Koklina redakcionelnje sobu skutkowała. Wudawaćel je Domowina, woni su 300 eksemplary produkowali a tute so rozdźěluja na šulach w Ralbicach, Worklecach, w Radworju a w Budyšinje. 124-stronski zešiwk jara nazornje wo wšelakich pućach wot šule hač do powołanja informuje. To wosebite: W brošurce so młodźi ludźo sami słowa jimaja. Na přikład rybar, kiž je mjeztym hižo w mišterskim dalekubłanju. Někak 70 wšelakich dźěłowych městnow we Łužicy je so cyle praktisce předstajiło. Nimo toho młodostni wjele dobrych tipow dóstawaja, wot spisanja porjadneho požadanja hač do žórłow pjenježneje podpěry. Hač chceš radšo w zarjedźe abo na róštach dźěłać, ze zežiwidłami abo z wuměłstwom činić měć, pak něšto produkować abo posłužować, wosrjedź přirody abo za kompjuterom kokać, skerje so fungowacym mašinam abo strowoće druhich ludźi wěnować – wot pinčnika hač do kfz-mechatronikarja maš sěroki dohlad do swěta dźěła. Ta druha wosebitosć: Wšě poskitki dźěławosće su w našim regionje doma. Młodostni spóznawaja: Zajimaweho joba dla njetrjebaš domiznu wopušćić. A z tym brošurka Łužiskim zawodam pomha, dorost dóstać. Serbskorěčna brošurka z lisćinu serbskich firmow je zdobom pohon młodostnym, w swojej maćeršćinje so dale wukmanjeć resp. serbskorěčne kmanosće polěpšeć, wšako je wjele zawodow zdobom z rěčnym rumom. A komuž je serbšćina wažna, tón je tež w domiznje wosebje zakótwjeny a dołhodobnje spušćomny sobudźěłaćer. W interneće je brošurka na stronje Domowiny přistupna:https://www.domowina.de/fileadmin/Assets/Domowina/Mediathek/Publikationen/2019Mojewukublanje.pdfFoto: Marija-Tereza Krawžic je dźensa brošurku šulerjej 9. lětnika Worklečan šule přepodała – wšo dohromady šula 40 eksemplarow dósta (foto: Domowina), pod tutym linkom móžeće sej foto za wozjewjenje wupytać: https://wetransfer.com/downloads/079d46b2a86c9393c4c681e05325bf6a20200124130501/153a55cf06b23a77631733d618a0a47e20200124130501/f1a8f2