Dźensa su sej zamołwići za Serbske kulturne lěto w Liberecu prěni raz w času koronakrizy zaso do Budyšina dojěli. Loni nazymu zahajene Serbske kulturne lěto, organizowane wot towarstwa Societas Amicuum Liberec, bu w měrcu koronawirusa a zawěraneje němsko-čěskeje hranicy dla přetorhnjene. Nětko je koordinatorka projekta Jana Vančatová z małej delegaciju najprjedy Domowinu w Serbskim domje wopytała, kotraž je do tutoho projekta zapřijata, doniž njejsu so do Serbskeho muzeja podali. Na rozmołwje w Domowinskim zarjedźe je so tež Judith Kubicec, intendantka Serbskeho ludoweho ansambla, wobdźěliła.Po rozmołwje so Clemens Škoda, referent Domowiny za kulturu a wukraj, wupraja:„Po lońšim jara wuspěšnym zahajenju a pokročowanju Serbskeho kulturneho lěta w Liberecu, na kotrymž je tež wjele wopytowarjow z Łužicy podźěl brało, wjeselimy so hromadźe na dalše zarjadowanja wot nazymy w Liberecu. Wěste je, zo tučasnje ničo wěste njeje, ale dyrbimy so zasadnje na terminy dojednać, zo bychu planowanja zaběželi. Ze Serbskim ludowym ansamblom a Serbskim muzejom profesionalnej partneraj dale sobu skutkujetej. My jako třěšny zwjazk Serbow chcemy wězo kaž dotal serbske kulturne ćělesa a dalšich akterow do Serbskeho kulturneho lěta zapřijeć a towarstwu Societas Amicuum Liberec při organizaciji projekta pomhać.”