Wjeršk jubilejneho lěta Handrija Zejlerja a Korle Awgusta Kocora 2022 https://www.domowina.de/fileadmin/Assets/Domowina/Mediathek/Material_Domowina_NEWS_Anlagen/2022_Leto_Zejlerja_a_Kocora.pdf (přehlad zarjadowanjow je na internetnej stronje Domowiny přistupny) je „Serbski spěwanski swjedźeń” sobotu, 29. winowca/oktobra 2022 w 17 hodź. w Budyskej „Krónje”. Wo tym informuje projektna managerka třěšneho zwjazka Rejzka Krügerowa. Hižo loni nazymu je wuměłski nawoda wječora Friedemann Böhme wšitke serbske chóry a spěwne ćělesa přeprosył. Serbski wječor z něhdźe 350 wobdźělnikami njeje jeno dźak wšitkim angažowanym spěwarkam a spěwarjam, ale twori zdobom wusahowacy podawk po historiskim přikładźe:

„Naše serbske chóry su wulka kulturna bohatosć. Wot prěnjeho spěwanskeho swjedźenja w oktobrje 1845 w Budyšinje pod nawodom Korle Awgusta Kocora – tehdy bu naša dźensniša hymna ,Rjana Łužica’ z tekstom Zejlerja a z hudźbu Kocora prapředstajena – přez festiwale serbskeje kultury (1966-1989) hač do načasneho kulturneho žiwjenja je chórowa hudźba sylny zakład našeje serbskeje identity”, praji Friedemann Böhme.

Spěwanski swjedźeń je projekt na iniciatiwu Zwjazka serbskich spěwarskich towarstwow w kooperaciji ze Serbskim ludowym ansamblom, Domowinu a Załožbu za serbski lud. Zarjadowanje nima koncertantny raz, ale format zhromadneho swjedźenja. K tomu dósta kóždy chór hižo w nalěću notowy zešiwk. Tak mějachu wšitke chóry móžnosć, twórby w běhu lěta nazwučować. Tak zaklinčachu w probowych rumnosćach hižo we wšitkich kónčinach Łužicy w serbskich chórach zynki Kocora a słowa Zejlerja.

14 chórow a ćělesow budźe na žurli w Budyšinje, kotraž je wupředata. Wone njemóža so jenož na zhromadne spěwanje, ale tež na wječer a reje wjeselić. Štóž chce na tutym historiskim wjeršku podźěl brać, njech prošu wužije livestream: https://www.youtube.com/watch?v=b6l5crQPiUc.

Njedźelu, dnja 30. winowca/oktobra 2022, wotměje so w 17 hodź. w Budyskej tachantskej cyrkwi nutrnosć/nyšpor ze spominanjom na sławneju wótčincow Korlu Awgusta Kocora a Handrija Zejlerja. Tam zaklinča štyri twórby z nazwučowaneho repertoira. Na nyšpor su wšitcy wutrobnje přeprošeni.

Friedemann Böhme steji w času 17.-19.10.2022 serbskim medijam za interview k dispoziciji. Prosymy wo direktny kontakt: tel.: 03591/43604