Předsydstwo župy „Jan Arnošt Smoler” (JAS) Budyšin přiwza Staršisku iniciatiwu Radwor z. t. jako nowe sobustawske towarstwo. Wo tym informowaše regionalna rěčnica Katja Liznarjec po wuradźowanju gremija w formje telefoniskeje konferency: „Wjeselimy so, zo mamy angažowanych a kompetentnych zwjazkarjow za skrućenje a rozšěrjenje serbskich rěčnych rumow na zakładnej a wyšej šuli.” Radworske towarstwo organizuje tež tuchwilu kóždy tydźeń nowe serbskorěčne poskitki za swójby na internetnej stronje www.schadźowanka.de . Doskónčny rozsud wo přiwzaću ma župna hłowna zhromadźizna kónc lěta tworić.Čłonojo župneho předsydstwa su so dorozumili wo delegatach za Hłownu zhromadźiznu Domowiny 12.6.21. Župa ma dohromady 5 městnow. Zdobom podpěruja čłonojo gremija Dawida Statnika, kiž znowa jako předsyda Domowiny kandiduje.K Lětu župow chce župa mjez druhim nowowudaće lětaka wo domje Měrćina Nowaka w Njechornju přinošować. Z tym chcedźa Domowinske skupiny, towarstwa a zajimcow do domu našeho sławneho molerja a spisowaćela přeprosyć. Wo wuhotowanju a wobjimje budu čłonojo přichodny raz dale rěčeć.Wobšěrnišo wuměni so župne předsydstwo wo spominanju na serbskeho wunamakarja małeho kompjutera, Mikławša Joachima Wićaza z Kamjeneje. Spominanje při rowje w Drježdźanach ma so přewjesć, hdyž su postajenja korony dla zběhnjene. Jurij Łušćanski w mjenje župy JAS zarjadowanje přihotuje. Čłonojo chwalachu reportažu wo M. Wićazu w serbskim programje MDR njedźelu 14.3.21. J. Łušćanski mjenowaše tójšto dopokazow za to, zo je Wićaz serbsce rěčał. Jeho wučerjej běštaj mjez druhim Jan Andricki a Michał Nawka w Radworju; swoje lubosćinske listy estniskej přećelce a pozdźišej mandźelskej je z „Miklaschek” podpisał.Čłonojo župy podpěruja zdźerženje SAEK w Budyšinje. Tež tójšto serbskich digitalnych poskitkow bjez SAEK było njeby. Wo akcijach chcedźa so w župje hišće dorozumić.