Składnostnje 30. róčnicy zjednoćeneje Němskeje so předsyda Domowiny, Dawid Statnik, wupraja:„Prjedy chcychmy škitani być, dźensa chcemy swoju swobodu wužiwać. Měrliwa rewolucija rěkaše tež za Domowinu přewrót: Smy so wot centralistiskeje do bazodemokratiskeje organizacije přetworili. Mnohotnosć serbskeho ludu so we wšelakorosći našich skupin, zwjazkow a towarstwow pod zhromadnej třěchu wotbłyšćuje. Přichodna kročel budźe dalša regionalizacija našich strukturow, zo bychmy hišće lěpje lokalnym potrjebam při hajenju serbskeje rěče a kultury wotpowědować móhli. Nic jenož murja wosrjedź Němskeje je padnyła, ale tež hranicy mjez nami a dalšimi statami su so wotewrěli – tohodla mamy my Serbja dźensa jako mostytwarcy mjez zapadnym a wuchodnym, mjez němskim a słowjanskim swětom potenciale kaž hišće nihdy. Ja sej přeju, zo tež w tutym nastupanju hišće bóle z časom kročimy a wuměnu ze swojimi přećelemi a partnerami ze słowjanskeho wukraja jako wobstatk wšědneho serbskeho žiwjenja zapřimujemy.W zwisku ze zjednoćenjom ZRN a NDR běše zaručenje serbskich institucijow pod nowymi wuměnjenjemi lěta dołho wažna tema. Dźensa steji skrućenje a wuwiwanje rěčnych rumow we wšěch regionach Łužicy w srjedźišću – tutomu najwjetšemu wužadanju maja serbske institucije słužić. Wjeselu so, zo je konsens mjez zamołwitymi serbskich institucijow a gremijow, zo dyrbimy swoju dźěławosć a srědki spěchowanja wotpowědnje praktisce wusměrjeć. To budźe najwjetši nadawk přichodnych lět.Smy sej w Serbach přezjedni, zo chcemy swoju kulturnu a kubłansku awtonomiju zaměrnišo nałožować. Je wulke zbožo, zo dźensniši stat nas při tym konstruktiwnje přewodźuje. Ja wšěch Serbow přeprošam, w zhromadnosći serbskeje ciwilneje towaršnosće w našej Domowinje wo tym přemyslować, kak najefektiwnišo na dobro Serbstwa skutkujemy. Po mojim měnjenju steji tež runoprawosć a runowaha mjez Hornjej a Delnjej Łužicu na dnjowym porjedźe narodneje politiki.”